SVM KARUKUTTY
Shammah Visual Ministry, Karukutty. (Part of Signature Visual Media)
കുട്ടികള്ക്കും യുവജനങ്ങള്ക്കും മറ്റെല്ലാവര്ക്കും നന്മയുടെ വഴിയെ സഞ്ചരിക്കാന് ഉപകാരപ്രദമാകുന്ന വചനചിന്തകള് ചുരുങ്ങിയ സമയദൈര്ഘ്യത്തില്.... പ്രകാശത്തിന്റെ വചനങ്ങളിലൂടെയും വിശുദ്ധരുടെ വഴികളിലൂടെയും അനുഭവ സാക്ഷ്യങ്ങളിലൂടെയും ചലച്ചിത്രാവിഷ്കാരങ്ങളിലൂടെയും Action Song കളിലൂടെയും ദൈവരാജ്യ അനുഭവത്തിലേക്ക് നിങ്ങളെ കൂട്ടികൊണ്ടുപോകുന്ന വൈദികരും സന്യാസിനികളും അല്മായ ശുശ്രൂഷകരും കുട്ടികളും യുവജനങ്ങളും ഒരുക്കുന്ന സ്വര്ഗ്ഗീയ വിരുന്ന്... കാണുക പങ്കുവയ്ക്കുക...
SVM KARUKUTTY
അനുദിനവിശുദ്ധര് : മെയ് 21
സന്യാസിയായിരുന്ന വിശുദ്ധ ഗോഡ്രിക്ക്
നോര്ഫോക്കിലെ വാള്പോളിലാണ് വിശുദ്ധ ഗോഡ്രിക്ക് ജനിച്ചത്. യുവാവായിരിക്കെ ഗ്രാമങ്ങളില് സാധനങ്ങള് കൊണ്ട് നടന്ന് കച്ചവടം ചെയ്യുന്നതായിരുന്നു വിശുദ്ധന്റെ ജോലി. നഗരങ്ങളിലെ വിപണന മേളകളിലേയും സ്ഥിരം സന്ദര്ശകനായിരുന്നു വിശുദ്ധന്. കൂടാതെ നിരവധി കടല്യാത്രകളും വിശുദ്ധന് നടത്തിയിട്ടുണ്ട്. അതിലൊന്ന് വിശുദ്ധ ദ്വീപെന്ന് അദ്ദേഹം വിളിച്ചിരുന്ന ലിന്ഡിസ്ഫാര്ണേയിലേക്കായിരുന്നു. അവിടെവെച്ച് ലൗകീക ജീവിതത്തില് നിന്നും വിരമിച്ച് മതപരമായ ആത്മീയ ജീവിതം നയിക്കുന്ന സന്യാസിമാരുടെ ജീവിതരീതിയില് വിശുദ്ധന് ആകൃഷ്ടനായി. വിശുദ്ധ കുത്ബെര്ട്ടിനെ സംബന്ധിച്ച എല്ലാക്കാര്യങ്ങളും വിശുദ്ധന് ആ സന്യാസിമാരില് നിന്നും മനസ്സിലാക്കി. തുടര്ന്ന് വിശുദ്ധന് ആ ദ്വീപിന്റേയും, അയല്ദ്വീപായ ഫാര്ണെയുടേയും എല്ലാ ഉള്പ്രദേശങ്ങളും സന്ദര്ശിച്ചു.
വിശുദ്ധ കുത്ബെര്ട്ടിനെ അനുകരിച്ചുകൊണ്ട് വിശുദ്ധ ജീവിതം നയിക്കുവാന് വേണ്ട അനുഗ്രഹം തനിക്ക് നല്കണമെന്ന് വിശുദ്ധന് കണ്ണുനീരോടുകൂടി ദൈവത്തോടു യാചിച്ചു. അതിനായി തനിക്കുള്ളതെല്ലാം ഉപേക്ഷിക്കുവാന് വിശുദ്ധന് തീരുമാനിച്ചു. തുടര്ന്ന് വിശുദ്ധ നാടായ ജെറൂസലേമിലേക്കൊരു അനുതാപപരവുമായ തീര്ത്ഥാടനം നടത്തികൊണ്ട് ഗോഡ്രിക്ക് തന്റെ ജീവിതത്തിന്റെ പുതിയൊരു അദ്ധ്യായത്തിലേക്ക് പ്രവേശിച്ചു.
മടക്കയാത്രയില് കൊമ്പോസ്റ്റെല്ലായും വിശുദ്ധന് സന്ദര്ശിച്ചു. നോര്ഫോക്കില് തിരിച്ചെത്തിയ വിശുദ്ധന് ഒരു ധനികന്റെ വീട്ടിലെ കാര്യസ്ഥനായി ജോലിയില് പ്രവേശിച്ചു. അവിടത്തെ ജോലിക്കാര് യാതൊരു നിയന്ത്രണമില്ലാത്തവരും, പതിവായി ജോലിക്ക് വരാത്തവരുമായിരുന്നു, ഇവരെ കുറിച്ച് വിശുദ്ധന് പരാതിപ്പെട്ടെങ്കിലും വീട്ടുടമസ്ഥന് അത് കാര്യമായി എടുത്തില്ല. അതിനാല് താനും അവരുടെ കുറ്റകൃത്യങ്ങളില് ഉള്പ്പെട്ടുപോകുമെന്ന ഭയത്തില് വിശുദ്ധന് അവിടം വിട്ടു.
റോമിലും, ഫ്രാന്സിലെ ഗൈല്സിലും തീര്ത്ഥാടനം നടത്തിയ ശേഷം വിശുദ്ധന് താന് ആഗ്രഹിച്ച രീതിയിലുള്ള ആത്മീയ ജീവിതം നയിക്കുന്നതിനായി ഇംഗ്ലണ്ടിന്റെ വടക്കേ അറ്റത്തേക്ക് പോയി. ദുര്ഹാമിലേ ആശ്രമത്തില് വളരെകാലം ചിലവഴിക്കുകയും, ധാരാളം സന്യാസിമാരുമായി ഇടപഴകുകയും ചെയ്തിട്ടുള്ള ഗോഡ്വിന് എന്ന് പേരായ ദൈവഭയമുള്ള ഒരു ഭക്തന് വിശുദ്ധന്റെ ഒപ്പം കൂടി. അവര് കാര്ലിസ്ലെക്ക് വടക്കുള്ള വനത്തില് പരസ്പരം സഹായിച്ചുകൊണ്ട് വളരെ കാര്ക്കശ്യത്തോട് കൂടിയുള്ള സന്യാസജീവിതമാരംഭിച്ചു.
രാത്രിയും, പകലും അവര് ദൈവസ്തുതികളുമായി കഴിഞ്ഞു കൂടി. രണ്ട് വര്ഷത്തിന് ശേഷം ചെറിയൊരു അസുഖം ബാധിച്ച ഗോഡ്വിന് കര്ത്താവില് അന്ത്യനിദ്ര പ്രാപിച്ചു. തന്റെ സഹചാരിയെ നഷ്ടപ്പെട്ട വിശുദ്ധന് വീണ്ടും ജെറൂസലേമിലേക്കൊരു തീര്ത്ഥാടനം നടത്തി. തിരിച്ചു വന്നതിനു ശേഷം കുറച്ച് കാലം ഇപ്പോള് വിറ്റ്ബി എന്നറിയപ്പെടുന്ന സ്ട്രേനെഷാല്ച്ചില് ഏകാന്തജീവിതം നയിച്ചു. ഒരു വര്ഷവും കുറച്ച് മാസങ്ങളും അവിടെ ചിലവഴിച്ചതിന് ശേഷം ഫിന്ക്ലി എന്ന മരുഭൂമിയിലേക്ക് പോയി. വിശുദ്ധ സ്നാപകയോഹന്നാനും, വിശുദ്ധ കുത്ബെര്ട്ടുമായിരുന്നു ഗോഡ്രിക്കിന്റെ മാതൃകകള്.
അവിടത്തെ വിശുദ്ധന്റെ ജീവിതരീതികള് അനുകരിക്കേണ്ടതിലും ഉപരിയായി ആദരിക്കേണ്ടവയായിരുന്നു. മനപാഠമാക്കിയിട്ടുള്ള സങ്കീര്ത്തങ്ങളും, പ്രാര്ത്ഥനകളും ആവര്ത്തിച്ച് കൊണ്ട് അദ്ദേഹം ദൈവത്തെ മഹത്വപ്പെടുത്തി. വിശുദ്ധന് പാതിരാത്രി മുതല് നേരം വെളുക്കുന്നത് വരെ പതിവായി ചൊല്ലുമായിരുന്നു. ദൈവവുമായിട്ടുള്ള സംവാദത്തിന്റെ കാര്യത്തില് വളരെയധികം അനുഭവസമ്പത്തുള്ളവനായിരുന്നു വിശുദ്ധന്. രോഗബാധയും, അള്സറും മൂലമുള്ള അതിശക്തമായ വേദനകള്ക്കിടയിലും വിശുദ്ധന് കാണിച്ചിട്ടുള്ള ക്ഷമാശക്തി എടുത്ത് പറയേണ്ടതാണ്.
മറ്റുള്ളവരുടെ പ്രശംസയും, കീര്ത്തിയും നേടിതരുന്ന കാര്യങ്ങള് വിശുദ്ധന് പരമാവധി ഒളിച്ചുവെച്ചു. മറ്റുള്ളവര് തന്നെ കാണുന്നതോ, സംസാരിക്കുന്നതോ വിശുദ്ധന് ഇഷ്ടമായിരുന്നില്ല. എല്ലാതരത്തിലുള്ള അഹങ്കാരങ്ങളില് നിന്നും, പൊങ്ങച്ചങ്ങളില് നിന്നും വിശുദ്ധന് അകന്ന് നിന്നു. താന് ഏറ്റവും വലിയ പാപിയും, സന്യാസജീവിതത്തിന് യോജിക്കാത്തവനും, മടിയനും, അഹങ്കാരിയുമൊക്കെയായാണ് വിശുദ്ധന് തന്നെ തന്നെ സ്വയം പരിഗണിച്ചിരുന്നത്. തനിക്ക് സഹായങ്ങള് ചെയ്യുന്നവരേയും വിശുദ്ധന് ശകാരിക്കുമായിരുന്നു. എന്നാല് എത്രമാത്രം വിശുദ്ധന് തന്നെതന്നെ എളിയവനാക്കിയോ, അത്രമാത്രം ദൈവം വിശുദ്ധനെ അത്ഭുതകരമായ സമ്മാനങ്ങളാല് ഉന്നതനാക്കി.
തന്റെ മരണത്തിന് മുന്പ് നിരവധി വര്ഷങ്ങളോളം വിശുദ്ധന് രോഗബാധിതനായി ശയ്യാവലംബിയായിരുന്നു. അദ്ദേഹത്തിന്റെ ശരീരം മരിച്ചപോലെയായിരുന്നുവെങ്കിലും, അദ്ദേഹത്തിന്റെ നാവ് ത്രീത്വൈക ദൈവത്തെ എപ്പോഴും ഉച്ചരിച്ചുകൊണ്ടിരുന്നതായി ഇക്കാലയളവില് വിശുദ്ധനെ സന്ദര്ശിച്ച ന്യൂബ്രിഡ്ജിലെ വില്ല്യം പറഞ്ഞിട്ടുണ്ട്. ഏതാണ്ട് 63 വര്ഷത്തോളം ഈ മരുഭൂമിയില് ജീവിച്ചതിനു ശേഷം1170 മെയ് 21ന് അദ്ദേഹം കര്ത്താവില് അന്ത്യനിദ്ര പ്രാപിച്ചു.
ഹെന്രി രണ്ടാമന്റെ ഭരണകാലത്തായിരുന്നു വിശുദ്ധന് മരണപ്പെടുന്നത്. അദ്ദേഹത്തിന്റെ ഭൗതീകശരീരം വിശുദ്ധ സ്നാപകയോഹന്നാന്റെ ദേവാലയത്തില് അടക്കം ചെയ്തു. ഗോഡ്രിക്ക് വിശുദ്ധനാണെന്നുള്ളതിനു നിരവധി അത്ഭുതങ്ങള് സാക്ഷ്യം വഹിക്കുന്നു. ദുര്ഹാമിലെ മെത്രാനായിരുന്ന ഹുഗ് പിഡ്സിയുടെ സഹോദരനായിരുന്ന റിച്ചാര്ഡ് വിശുദ്ധ ഗോഡ്രിക്കിന്റെ സ്മരണാര്ത്ഥം ഒരു ചെറിയ ദേവാലയം പണികഴിപ്പിച്ചിട്ടുണ്ട്.
1 week ago | [YT] | 432
View 9 replies
SVM KARUKUTTY
അനുദിനവിശുദ്ധര് : മെയ് 19
മാര്പാപ്പയായിരുന്ന വിശുദ്ധ പീറ്റര് സെലസ്റ്റിന്
1221-ല് അപുലിയയിലാണ് പാപ്പായായിരുന്ന വിശുദ്ധ പീറ്റര് സെലസ്റ്റിന് ജനിച്ചത്. ആഴമായ സ്നേഹവും തങ്ങളുടെ കഴിവിന്റെ പരമാവധി പാവങ്ങളോടു കരുണ കാണിക്കുന്നവരുമായിരുന്നു വിശുദ്ധന്റെ മാതാ-പിതാക്കള്. വിശുദ്ധന്റെ പിതാവിന്റെ മരണത്തിനു ശേഷം തനിക്ക് മറ്റ് പതിനൊന്ന് മക്കള് ഉണ്ടായിരുന്നിട്ടു പോലും വിശുദ്ധന്റെ അസാധാരണമായ ഭക്തിയും, ഇഷ്ടവും കണ്ടിട്ട് വിശുദ്ധന്റെ മാതാവ് പീറ്ററിന് നല്ല വിദ്യാഭ്യാസം നല്കി. തന്റെ ആഗ്രഹപ്രകാരം വിശുദ്ധന് തന്റെ 20-മത്തെ വയസ്സില് വിദ്യാഭ്യാസം മതിയാക്കി പര്വ്വതപ്രദേശത്ത് ഒരു ഭൂഗര്ഭ അറയിലെ ചെറിയ മുറിയില് ഏകാന്ത ജീവിതമാരംഭിച്ചു.
ഏതാണ്ട് മൂന്ന് വര്ഷങ്ങളോളം വിശുദ്ധന് ഈ ഇടുങ്ങിയ മുറിയില് താമസിച്ചു. പിന്നീട് റോമില് വെച്ച് വിശുദ്ധന് പൗരോഹിത്യ പട്ടം സ്വീകരിച്ചു. എന്നാല് 1246-ല് വിശുദ്ധന് അബ്രൂസോയില് തിരികെ വരികയും സുല്മോണക്ക് സമീപത്തുള്ള മൊറോണി പര്വതത്തിലെ ഒരു ഗുഹയില് താമസമാരംഭിച്ചു, ഏതാണ്ട് 5 വര്ഷത്തോളം വിശുദ്ധന് ഇവിടെ ചിലവഴിച്ചു. ഈ ജീവിതത്തിനിടക്ക് വിശുദ്ധന് ആന്തരികമായ നിരവധി പരീക്ഷണങ്ങളും പ്രലോഭനങ്ങളും നേരിടേണ്ടി വന്നു. ചില അവസരങ്ങളില് രാത്രികാലങ്ങളില് ഉറക്കത്തില് വിശുദ്ധന് ചില മായാദര്ശനങ്ങള് ഉണ്ടായി, ഇത് വിശുദ്ധനെ നിരാശയിലാഴ്ത്തുകയും, വിശുദ്ധന് തന്റെ സന്യാസജീവിതം ഉപേക്ഷിക്കുവാന് വരെ തീരുമാനമെടുക്കുന്ന സാഹചര്യമുണ്ടായി.
എന്നാല് വിശുദ്ധന്റെ കുമ്പസാരകന് അതെല്ലാം സാത്താന്റെ പരീക്ഷണങ്ങളാണെന്ന് ഉപദേശിച്ചുകൊണ്ട് വിശുദ്ധന് ധൈര്യം നല്കി. തുടര്ന്ന് ഇക്കാര്യത്തില് പാപ്പായുടെ ഉപദേശം ആരായുവാനായി വിശുദ്ധന് റോമിലേക്ക് പോയെങ്കിലും വഴിയില് വെച്ച് ഒരു ദൈവീക മനുഷ്യന്റെ ദര്ശനം ഉണ്ടാവുകയും ആദ്ദേഹവും വിശുദ്ധനോട് തന്റെ മുറിയിലേക്ക് മടങ്ങി പോകുവാനും നിത്യവും വിശുദ്ധ കുര്ബ്ബാന അര്പ്പിക്കുവാനും ഉപദേശിച്ചു. വിശുദ്ധന് അപ്രകാരം ചെയ്തു. 1251-ല് വിശുദ്ധന് തന്റെ രണ്ട് സഹചാരികള്ക്കൊപ്പം മഗേല്ല മലയിലേക്ക് പോവുകയും മരകൊമ്പുകളും ഇലകളും കൊണ്ട് ഒരു ചെറിയ ആശ്രമകുടീരം പണിയുകയും അവിടെ സന്തോഷപൂര്വ്വം തങ്ങളുടെ ആശ്രമജീവിതം തുടരുകയും ചെയ്തു. ഇടക്കൊക്കെ പിശാചിന്റെ പരീക്ഷണങ്ങള് ഉണ്ടായെങ്കിലും അവര് അവയെല്ലാം വിശ്വാസത്താല് തരണം ചെയ്തു.
വിശുദ്ധന്റെ മാതൃകപരമായ ജീവിതം കണ്ട് നിരവധിപേര് അദ്ദേഹത്തിന്റെ ശിഷ്യത്വത്തിനായി വന്നെങ്കിലും, മറ്റുള്ളവരെ നയിക്കുവാനുള്ള കഴിവ് തനിക്കില്ല എന്ന് പറഞ്ഞുകൊണ്ട് വിശുദ്ധന് അവരെ മടക്കിഅയച്ചു. എന്നാല് വിശുദ്ധന്റെ അപാരമായ എളിമ മൂലം വളരെ ഭക്തരായ കുറച്ച് പേരെ വിശുദ്ധന് തന്റെ കൂടെ താമസിക്കുവാന് അനുവദിച്ചു. തന്റെ രാത്രികാലങ്ങളുടെ ഭൂരിഭാഗം സമയവും വിശുദ്ധന് പ്രാര്ത്ഥനക്കായിട്ടായിരുന്നു ചിലവഴിച്ചിരുന്നത്. പകല് സമയങ്ങളില് വിശുദ്ധ ഗ്രന്ഥങ്ങള് പകര്ത്താന് അദ്ദേഹം സമയം കണ്ടെത്തി. മാംസം അദ്ദേഹം പൂര്ണ്ണമായും വര്ജ്ജിച്ചു. ഞായര് ഒഴികെയുള്ള ദിവസങ്ങളില് വിശുദ്ധന് ഉപവസിക്കുക പതിവായിരുന്നു.
എല്ലാ വെള്ളിയാഴ്ചകളിലും വെറും അപ്പവും വെള്ളവുമായിരുന്നു വിശുദ്ധന്റെ ഭക്ഷണം. കുതിരയുടെ രോമം കൊണ്ടുള്ള പരുക്കനായ വസ്ത്രമായിരുന്നു വിശുദ്ധ പീറ്റര് ധരിച്ചിരുന്നത്. അരയില് ഇരുമ്പ് കൊണ്ടുള്ള ഒരു ചങ്ങലയും. വെറും നിലമോ അല്ലെങ്കില് പലകയോ ആയിരുന്നു വിശുദ്ധന്റെ കിടക്ക. താന് നോമ്പ് നോക്കുന്ന അവസരങ്ങളിലും, ബുധനാഴ്ചകളും, വെള്ളിയാഴ്ചകളും ഒഴികെയുള്ള ദിവസങ്ങളില് വിശുദ്ധന് വിശ്വാസികള്ക്ക് ഉപദേശങ്ങള് നല്കിപോന്നു. തന്നെ പിന്തുടരുന്നവരെയെല്ലാം ഒരുമിച്ചു കൂട്ടി വിശുദ്ധന് ഔര് സന്യാസസമൂഹത്തിനു രൂപം നല്കുകയും 1274-ല് ഗ്രിഗറി പത്താമന് പാപ്പായുടെ അംഗീകാരം തന്റെ പുതിയ സന്യാസസഭക്ക് നേടിയെടുക്കുകയും ചെയ്തു.
വിശുദ്ധ ബെന്നറ്റിന്റെ സഭാനിയമങ്ങളാണ് തന്റെ സഭയില് അദ്ദേഹം പിന്തുടര്ന്നിരുന്നത്. വിശുദ്ധ പീറ്റര് സെലസ്റ്റിന്റെ സന്യാസസമൂഹം വികസിക്കുകയും വിശുദ്ധന്റെ അവസാനകാലമായപ്പോഴേക്കും ഏതാണ്ട് 36 സന്യാസ ആശ്രമങ്ങളും, 600 സന്യാസി-സന്യാസിനിമാര് വിശുദ്ധന്റെ സഭക്കുണ്ടായിരുന്നു. നിക്കോളാസ് നാലാമന്റെ മരണത്തോടെ റോമിലെ പരിശുദ്ധ സിംഹാസനം ഏതാണ്ട് രണ്ട് വര്ഷവും മൂന്നു മാസത്തോളം കാലം ഒഴിവായി കിടന്നു. തുടര്ന്ന് കര്ദ്ദിനാള്മാര് പെരൂജിയില് സമ്മേളിക്കുകയും പീറ്റര് സെലസ്റ്റിനെ നിക്കോളാസ് നാലാമന്റെ പിന്ഗാമിയായി ഏകാഭിപ്രായത്തോടെ തിരഞ്ഞെടുക്കുകയും ചെയ്തു.
ഈ വാര്ത്ത അറിഞ്ഞ പീറ്റര് പരിഭ്രാന്തനാവുകയും, താന് ആ പദവിക്ക് യോഗ്യനല്ലെന്ന് സമര്ത്ഥിക്കുവാന് ശ്രമിച്ചുവെങ്കിലും ഫലം കണ്ടില്ല. തുടര്ന്ന് ഹംഗറിയിലേയും, നേപ്പിള്സിലേയും രാജാക്കന്മാരുടെയും, നിരവധി കര്ദ്ദിനാള്മാരുടേയും, രാജകുമാരന്മാരുടേയും സാന്നിദ്ധ്യത്തില് അക്വിലായിലെ കത്രീഡലില് വെച്ച് ഓഗസ്റ്റ് 29ന് സെലസ്റ്റീന് അഞ്ചാമന് എന്ന നാമം സ്വീകരിച്ചുകൊണ്ട് വിശുദ്ധന് റോമിന്റെ മെത്രാനായി അഭിഷിക്തനായി.
അന്നുമുതല് വിശുദ്ധന്റെ സന്യാസിമാര് സെലസ്റ്റീന്സ് എന്ന പേരിലാണ് അറിയപ്പെടാന് തുടങ്ങിയത്. നേപ്പിള്സിലെ രാജാവായ ചാള്സ് തന്റെ രാജ്യത്തെ സഭാപരമായ ചില പ്രശ്നങ്ങള് പരിഹരിക്കുവാനും, ഒഴിവായി കിടക്കുന്ന ചില സഭാപദവികളിലേക്ക് നിയമനങ്ങള് നടത്തുവാനുമായി വിശുദ്ധനെ തന്റെ തലസ്ഥാനത്തേക്ക് വരുവാന് പ്രേരിപ്പിച്ചു. എന്നിരുന്നാലും പുതിയ പാപ്പായുടെ ചില പ്രവര്ത്തികള് നിരവധി കര്ദ്ദിനാള്മാരുടെ അപ്രീതിക്ക് കാരണമായി. പാപ്പാ പദവിയുടെ ആഡംബരത്തിനിടക്കും വിശുദ്ധന് തന്റെ ആശ്രമപരമായ ജീവിതമായിരുന്നു നയിച്ചിരുന്നത്.
ക്രിസ്തുമസിനു വേണ്ടി ആത്മീയമായി ഒരുങ്ങുവാനായി വിശുദ്ധന് സഭയുടെ ചുമതല താല്ക്കാലികമായി മൂന്ന് കര്ദ്ദിനാള്മാരെ ഏല്പ്പിച്ചു. ഇതും വിശുദ്ധനെതിരെ വിമര്ശനങ്ങള് ക്ഷണിച്ചു വരുത്തി. തനിക്ക് നേരെയുയര്ന്ന വിമര്ശനങ്ങളും, സന്യാസജീവിതത്തോടുള്ള വിശുദ്ധന്റെ ആഗ്രഹവും തന്റെ പാപ്പാ പദവി ഉപേക്ഷിക്കുവാന് വിശുദ്ധനെ പ്രേരിപ്പിച്ചു. തുടര്ന്ന് സഭാനിയമങ്ങളില് പാണ്ഡിത്യമുള്ള കര്ദ്ദിനാള് ആയിരുന്ന ബെനഡിക്ട് കജേതനുമായി വിശുദ്ധന് ഇക്കാര്യം ആലോചിച്ചതിന്റെ അടിസ്ഥാനത്തില് 1294 ഡിസംബര് 13ന് നേപ്പിള്സിലെ കര്ദ്ദിനാള്മാരുടെ സമ്മേളനത്തില് വെച്ച് നേപ്പിള്സിലെ രാജാവിന്റെയും മറ്റുള്ളവരുടേയും സാന്നിദ്ധ്യത്തില് വെച്ച് വിശുദ്ധന് തന്റെ പാപ്പാ പദവി ഉപേക്ഷിക്കുകയും, തന്റെ ഈ പ്രവര്ത്തിയില് ദൈവ സന്നിധിയില് ക്ഷമയാചിക്കുകയും ചെയ്തു.
വിശുദ്ധന്റെ പിന്ഗാമിയായി പാപ്പാ പദവിയിലെത്തിയത് കര്ദ്ദിനാള് ആയിരുന്ന ബെനഡിക്ട് കജേതനായിരുന്നു. വിശുദ്ധ സെലസ്റ്റിന്റെ സ്ഥാനത്യാഗത്തെ കുറിച്ച് വിവിധ തരത്തിലുള്ള അഭിപ്രായങ്ങള് ഉണ്ടായി. ഡാന്റെയുടെ അഭിപ്രായത്തില് വിശുദ്ധന്റെ പ്രവര്ത്തി ഒരു ഭീരുത്വപരമായ പ്രവര്ത്തിയായിരുന്നു. എന്നാല് പെട്രാര്ക്ക്, ‘തന്നെതന്നെ ശൂന്യനാക്കി കൊണ്ടുള്ള ഒരു ധീരമായ പ്രവര്ത്തിയായിട്ടാണ്’ വിശുദ്ധന്റെ സ്ഥാനത്യാഗത്തെ വിശേഷിപ്പിച്ചത്.
വിശുദ്ധനാകട്ടെ ഒട്ടും വൈകാതെ തന്നെ മൊറോണിയിലുള്ള തന്റെ ആശ്രമത്തിലേക്ക് പിന്വാങ്ങി. എന്നാല് പുതിയ പാപ്പായുടെ നടപടികളിലും, കാര്ക്കശ്യത്തിലും അസന്തുഷ്ടരായ ചിലര് പാപ്പയായ ബോനിഫസ് വിശുദ്ധനില് നിന്നും പാപ്പാസ്ഥാനം തട്ടിയെടുത്തതാണെന്ന് പ്രസ്താവിച്ചു. വിശുദ്ധന്റെ ദിവ്യത്വത്താല് അദ്ദേഹത്തിന്റെ ആശ്രമത്തിനു ചുറ്റും തടിച്ചു കൂടുന്ന ജനസഞ്ചയത്തെ ഭയന്നും, വിശുദ്ധനെ മറ്റുള്ളവര് തനിക്കെതിരെ ഉപകരണമാക്കുകയും, അത് സഭയില് കുഴപ്പങ്ങള്ക്കിടവരുത്തുകയും ചെയ്യുമോയെന്ന് ഭയന്നും ബോനിഫസ് പാപ്പാ വിശുദ്ധനെ റോമിലേക്കയക്കുവാന് നേപ്പിള്സിലെ രാജാവിനെ ചുമതലപ്പെടുത്തി. എന്നാല് ഇത് മനസ്സിലാക്കിയ വിശുദ്ധന്, അഡ്രിയാറ്റിക്ക് ഉള്ക്കടല് മറികടക്കുക എന്ന ലക്ഷ്യത്തോടു കൂടി കടല്മാര്ഗ്ഗം സഞ്ചരിച്ചു.
പക്ഷേ കാറ്റിന്റെ വിപരീത ഗതി കാരണം വിയസ്റ്റെ തുറമുഖത്തടുത്ത വിശുദ്ധനെ നേപ്പിള്സിലെ രാജാവ് അനാഗ്നിയില് ബോനിഫസ് പാപ്പായുടെ പക്കല് എത്തിച്ചു. പാപ്പാ വിശുദ്ധനെ കുറേകാലം തന്റെ കൊട്ടാരത്തില് പാര്പ്പിച്ചു. വിശുദ്ധന്റെ എളിമ കണ്ടിട്ട് ചിലര് അദ്ദേഹത്തെ സ്വതന്ത്രനാക്കുവാനും തന്റെ ആശ്രമജീവിതം തുടരുവാന് അനുവദിക്കുവാനും ബോനിഫസ് പാപ്പായോടു ആവശ്യപ്പെട്ടെങ്കിലും അത് അപകടകരമാണെന്ന് കണ്ട ബോനിഫസ് വിശുദ്ധനെ ഫുമോണെ കോട്ടയില് തടവില് പാര്പ്പിച്ചു.
അവിടെ വിശുദ്ധന് നിരവധി അപമാനങ്ങളും, കഷ്ടപ്പാടുകളും ഏല്ക്കേണ്ടി വന്നിട്ടുപോലും യാതൊരു പരാതിപോലും വിശുദ്ധന്റെ വായില് നിന്നും കേള്ക്കുവാന് കഴിഞ്ഞിട്ടില്ലെന്ന് ചരിത്രകാരന്മാര് രേഖപ്പെടുത്തിയിട്ടുണ്ട്. ദൈവസ്തുതികളും, പ്രാര്ത്ഥനയുമായി വിശുദ്ധന് അവിടെ കഴിഞ്ഞു. 1296-ലെ ഒരു ഞായറാഴ്ച അസാധാരണമായ ഭക്തിയോട് കൂടി വിശുദ്ധ കുര്ബ്ബാനയില് പങ്കെടുത്തതിനു ശേഷം വിശുദ്ധന് തന്റെ കാവല്ക്കാരോട് ഈ ആഴ്ച അവസാനത്തിനു മുന്പായി താന് മരിക്കുമെന്ന് വെളിപ്പെടുത്തിയതായി പറയപ്പെടുന്നു.
അധികം താമസിയാതെ വിശുദ്ധന് കടുത്ത പനി ബാധിച്ചു. അതേവര്ഷം മെയ് 19ന് ഞായറാഴ്ച തന്റെ 75-മത്തെ വയസ്സില് വിശുദ്ധന് കര്ത്താവില് അന്ത്യനിദ്ര പ്രാപിച്ചു. ബോനിഫസ് പാപ്പായും മറ്റ് കര്ദ്ദിനാള്മാരും വിശുദ്ധന്റെ സംസ്കാരക്രിയകളില് പങ്കെടുക്കുകയും ഫെറേന്റിനോയില് വിശുദ്ധനെ അടക്കം ചെയ്യുകയും ചെയ്തു. പിന്നീടു വിശുദ്ധന്റെ മൃതദേഹം അക്വിലായിലേക്ക് മാറ്റുകയും നഗരത്തിനടുത്തുള്ള സെലസ്റ്റിന് ദേവാലയത്തില് സൂക്ഷിക്കുകയും ചെയ്തു. ഇവിടെ നിരവധി അത്ഭുതങ്ങള് നടന്നിട്ടുള്ളതായി രേഖപ്പെടുത്തപ്പെട്ടിട്ടുണ്ട്. 1313-ല് ക്ലമന്റ് അഞ്ചാമന് പാപ്പായാണ് പീറ്റര് സെലസ്റ്റിനെ വിശുദ്ധനായി പ്രഖ്യാപിച്ചത്.
1 week ago | [YT] | 510
View 5 replies
SVM KARUKUTTY
അനുദിനവിശുദ്ധര് : മെയ് 18
വി. ഫെലിക്സ് (1515-1587)
ഉണ്ണിയേശുവിനെ കൈയിലെടുക്കുവാന് ഭാഗ്യം ലഭിച്ച വിശുദ്ധനാണ് ഫെലിക്സ് എന്നു വിശ്വസിക്കപ്പെടുന്നു. പരിശുദ്ധ കന്യാമറിയ ത്തിന്റെ ഭക്തനായിരുന്ന ഫെലിക്സിന് ഒരു ദിവസം മാതാവ് പ്രത്യക്ഷപ്പെടുകയും ഉണ്ണിയെ കൈകളില് ഏല്പ്പിക്കുകയു മായിരുന്നു. ഇറ്റലിയിലെ വളരെ പാവപ്പെട്ട ഒരു കുടുംബത്തിലാണ് ഫെലിക്സ് ജനിച്ചത്. യേശുവില് അടിയുറച്ചു വിശ്വസിച്ച ഒരു കുടുംബമായിരുന്നു അവന്റേത്. കുഞ്ഞുനാള് മുതല് ആട്ടിടയനായി ജോലി നോക്കിയ ഫെലിക്സിനെ ഒന്പതാം വയസില് ഒരാള് വാടകയ്ക്കെടുത്തു. അയാളുടെ ആടുകളെ നോക്കുക, കൃഷിപ്പണികള് ചെയ്യുക തുടങ്ങിയ ചുമതലകളായിരുന്നു അവന്. ഇരുപതു വര്ഷത്തോളം അവിടെ ഫെലിക്സ് ജോലിനോക്കി. ഒരിക്കല് കൃഷിപ്പണികള് ചെയ്തുകൊണ്ടിരിക്കെ രണ്ടു കാളകള് ഫെലിക്സിനെ കുത്താന് ശ്രമിക്കുകയും അവന് കലപ്പയുടെ മുകളില് കിടന്ന് വലിച്ചിഴയ്ക്കപ്പെടുകയും ചെയ്തു. എന്നാല്., ഫെലിക്സ് അദ്ഭുതകരമായി രക്ഷപ്പെട്ടു. ഫെലിക്സിന്റെ യജമാനന് ഈ സംഭവത്തിനു സാക്ഷിയായിരുന്നു. ദൈവത്തിന്റെ അദ്ഭുതകരമായ ഇടപെടല് മൂലമാണ് ഫെലിക്സ് രക്ഷപ്പെട്ടതെന്നു ബോധ്യമായ യജമാനന് അവനെ മതപഠനത്തിനായി പോകാന് അനുവദിച്ചു. അപ്പോള് 30 വയസു പ്രായമായിരുന്നെങ്കിലും ഫെലിക്സിന്റെ വിശ്വാസത്തിന്റെ ശക്തി മനസിലാക്കിയ കപ്യൂച്യന് സഭാ പുരോഹിതര് അവനെ സഭയില് ചേരാന് അനുവദിച്ചു. പുരോഹിതനായ ശേഷം പ്രേഷിതപ്രവര്ത്തനങ്ങള്ക്കായി ഫെലിക്സ് റോമിലേക്ക് പോയി. അവിടെ നാല്പതു വര്ഷത്തോളം പ്രവര്ത്തിച്ചു. രോഗികളുടെ പ്രിയപ്പെട്ടവനായിരുന്നു ഫെലിക്സ്. താന് സന്ദര്ശിച്ച രോഗികള്ക്കെല്ലാം ശാന്തിയും സമാധാനവും പകര്ന്നു കൊടുക്കുവാന് ഫെലിക്സിനു കഴിഞ്ഞു. ''പ്രിയപ്പെട്ട സഹോദരാ, നമുക്കു പോകാം. കൈകളില് ജപമാലയേന്തൂ, കണ്ണുകള് ഭൂമിയുടെ നേര്ക്കും ആത്മാവിനെ സ്വര്ഗത്തിന്റെ നേരെയും ഉയര്ത്തു.'' പ്രേഷിതജോലികള്ക്കു പോകുമ്പോള് ഫെലിക്സ് തന്റെയൊപ്പമുള്ളവരോട് ഇങ്ങനെ പറയുമായിരുന്നു. പരിശുദ്ധ മാതാവിനോടുള്ള ജപമാല ചൊല്ലുകയായിരുന്നു ഫെലിക്സിന്റെ ജീവിതത്തിലെ ഏറ്റവും വലിയ കാര്യം. ദിവസം രണ്ടു മണിക്കൂര് മാത്രമാണ് ആ വിശുദ്ധന് ഉറങ്ങിയിരുന്നത്. ബാക്കി സമയം മുഴുവന് പ്രേഷിതപ്രവര്ത്തനങ്ങള്ക്കും പ്രാര്ഥനയ്ക്കുമായി മാറ്റിവച്ചു. രോഗിയായി കിടപ്പിലായപ്പോഴും അവശത മറന്ന് പ്രാര്ഥന തുടരുകയാണ് ഫെലിക്സ് ചെയ്തത്. മരണസമയത്ത് പരിശുദ്ധ കന്യാമറിയവും മാലാഖമാരും തന്നെ കൈനീട്ടി വിളിക്കുന്നതായുള്ള ദര്ശനം ഫെലിക്സിനുണ്ടായി. സന്തോഷം കൊണ്ട് പൊട്ടിക്കരഞ്ഞുകൊണ്ടാണ് ഫെലിക്സ് മരിച്ചത്. 1712ല് പോപ് ക്ലെമന്റ് പതിനൊന്നാമന് ഫെലിക്സിനെ വിശുദ്ധനായി പ്രഖ്യാപിച്ചു.
1 week ago | [YT] | 406
View 7 replies
SVM KARUKUTTY
അനുദിനവിശുദ്ധര് : മെയ് 17
വിശുദ്ധ പാസ്കല് ബയിലോണ്
വിശുദ്ധ കുര്ബാനയുടെ സംഘടനകളുടെയും കോണ്ഗ്രസ്സുകളുടെയും മധ്യസ്ഥനായ വി.പാസ്കല് ബയിലോണ്, 1540-ല് സ്പെയിനില് അരഗേണില് തോരെ ഹോര്മോസെയിനില് പെന്തകുസ്ത തിരുനാള് ദിവസം ജനിച്ചു. സ്പാനിഷ് ഭാഷയില് പെന്തകുസ്ത തിരുനാള് പരിശുദ്ധാത്മാവിന്റെ പാസ്ക്ക് എന്നാണ് അറിയപ്പെടുന്നത്. അതിനാല് പാസ്ക്കല് എന്ന പേര് ശിശുവിന് നല്കി. ഭക്തരായ മാതാപിതാക്കന്മാര് ശിശുവിനെ ആദ്യം പഠിപ്പിച്ച വാക്കുകള് ഈശോ, മറിയം,യൌസേപ്പ് എന്നായിരിന്നു. കുഞ്ഞിനെ അമ്മ ആദ്യം പള്ളിയിലേക്ക് കൊണ്ട് പോയ ദിവസം അവന് മുഴുവന് സമയവും സക്രാരിയിലേക്ക് നോക്കിയിരിന്നുവെന്ന് പറയപ്പെടുന്നു. ഭാവിയില് സക്രാരിയോടുണ്ടാകാന് പോകുന്ന സ്നേഹമൊക്കെ ആ പ്രഥമസന്ദര്ശനത്തില് തന്നെ പ്രകടമാക്കി.
എട്ട് വയസ്സു മുതല് അവന് തന്റെ പിതാവിന്റെ ആടുകളെ മേയ്ക്കാന് തുടങ്ങി. അവന്റെ വടിയുടെ പിടിയില് ദൈവമാതാവിന്റെ ഒരു സ്വരൂപം കൊത്തിയിരിന്നു. ആടുകളെ മെയ്ക്കുമ്പോള് അവന്റെ ചിന്ത ഇടവക പള്ളിയിലേ സക്രാരിയിലേക്ക് താനേ തിരിഞ്ഞു പോയിരിന്നു. ആടുകള് മേച്ചില് സ്ഥലത്തെത്തിയാലുടനെ വടി ഒരു സ്ഥലത്ത് കുത്തി നിര്ത്തും. അത് അവന്റെ ഒരു കൊച്ചു പള്ളിയായി.
ദിവസം തോറും പാസ്ക്കല് വി.കുര്ബാന കണ്ടിരിന്നു. ഒരിക്കല് അവന് ആടുകളെ മേച്ചുകൊണ്ടിരിക്കുമ്പോള് വിശുദ്ധ കുര്ബാനയ്ക്കുള്ള മണി അടിക്കുന്നത് കേട്ടു. അപ്പോള് അവന് തീവ്രമായ ഭക്തിയോടെ അപേക്ഷിച്ചു; "കര്ത്താവേ ഞാന് അങ്ങയെ കാണട്ടെ" ഉടനെ ഒരു പ്രകാശം വീശുന്നതും ഒരു സ്വര്ണ്ണ കാസയുടെ മേല് തിരുവോസ്തി ഉയര്ന്ന് നില്ക്കുന്നതും പസ്ക്കല് ദര്ശിച്ചു. ഈ ദൃശ്യാനുഭവം പാസ്ക്കലിനെ ഫ്രാന്സിസ്ക്കന് സഭയിലേക്ക് ആനയിച്ചു.
ഒരു സന്യാസസഹോദരനെന്ന നിലയില് മാതൃകാപരമായിരിന്നു അദ്ദേഹത്തിന്റെ ജീവിതം. ദരിദ്രരോട് ക്രിസ്തുനാഥനോടെന്ന പോലെ അദ്ദേഹം വര്ത്തിച്ചു. ആശ്രമശ്രേഷ്ട്ടന് ഇങ്ങനെ ഒരിക്കല് പ്രസ്താവിക്കുകയുണ്ടായി: "ഇത്ര ശാന്തശീലനും കഠിനഹൃദയനുമായ വേറെയോരാളെ ഞാന് കണ്ടിട്ടില്ല. മറ്റുള്ളവരോട് അദ്ദേഹം മധുരമായി പെരുമാറും. തന്നോടു തന്നെ എത്രയും കഠിനമായി പ്രവര്ത്തിക്കും".
സക്രാരിയുടെ മുന്പില് പലപ്പോഴും അദ്ദേഹത്തെ സമാധിയിലാണ് ദര്ശിച്ചിരിന്നത്. ദിവ്യപൂജക്ക് ശുശ്രൂഷിക്കാനുള്ള പാസ്ക്കലിന്റെ താത്പര്യം നിമിത്തം ചില ദിവസങ്ങളില് എട്ടും പത്തും ദിവ്യപൂജയ്ക്ക് ശുശ്രൂഷിച്ചിരിന്നു. ഫ്രാന്സില് ഹ്യൂഗനോട്ട്സ് വി.കുര്ബാനയോട് പ്രദര്ശിപ്പിച്ചിരിന്ന അനാദരവ് നേരിട്ടു മനസ്സിലാക്കിയ പാസ്ക്കല് ഫ്രാന്സില് നിന്നു മടങ്ങി വന്നപ്പോള് അദ്ദേഹത്തിന്റെ ദിവ്യകാരുണ്യ ഭക്തി ഒന്നു കൂടി വര്ദ്ധിപ്പിച്ചു. 1592-ലെ പെന്തകുസ്ത ദിവസം ആശ്രമത്തിലെ പ്രധാന ദിവ്യപൂജയുടെ സമയത്ത് തിരുവോസ്തി ഉയര്ത്തിയ വേളയില് ആ ദിവ്യബലിയോട് ചേര്ന്ന് പാസ്ക്കലിന്റെ ആത്മാവും സ്വര്ഗ്ഗത്തിലേക്കുയര്ന്നു.
1 week ago | [YT] | 398
View 6 replies
SVM KARUKUTTY
അനുദിനവിശുദ്ധര് : മെയ് 16
രക്തസാക്ഷിയായ വിശുദ്ധ ജോണ് നെപോമുസെന്
1330-ല് ബൊഹേമിയയിലെ ഒരു ചെറുപട്ടണമായ നെപോമുക്കിലാണ് വിശുദ്ധ ജോണ് ജനിച്ചത്. തങ്ങളുടെ പ്രാര്ത്ഥനയുടെ ഫലമായിട്ടാണ് വിശുദ്ധനെ ലഭിച്ചതെന്നാണ് അദ്ദേഹത്തിന്റെ മാതാപിതാക്കള് വിശ്വസിച്ചിരുന്നത്. ജോണ് ജനിച്ച ഉടനേതന്നെ മാരകമായ രോഗം മൂലം ജീവന് അപകടത്തിലായി. എന്നാല് പരിശുദ്ധ ദൈവമാതാവിന്റെ മാദ്ധ്യസ്ഥത്തിലുള്ള അവരുടെ ആത്മവിശ്വാസം വിശുദ്ധനെ ആരോഗ്യവാനാക്കി. ഇതിനോടുള്ള നന്ദിപ്രകാശമായി അവര് തങ്ങളുടെ മകനെ ദൈവസേവനത്തിനു സമര്പ്പിച്ചു. മകന് മികച്ച വിദ്യാഭ്യാസം നല്കാനും ആ മാതാപിതാക്കള് മറന്നില്ല. പ്രഭാതങ്ങളില് വിശുദ്ധന് അടുത്തുള്ള ആശ്രമത്തില് പോയി ഒന്നിലധികം വിശുദ്ധ കുര്ബ്ബാനകളില് സംബന്ധിക്കുമായിരുന്നു.
പ്രാഥമിക വിദ്യാഭ്യാസം പൂര്ത്തിയാക്കിയ വിശുദ്ധന് ലാറ്റിന് ഭാഷ പഠിക്കുവാനായി സ്റ്റാസെ എന്ന പട്ടണത്തിലേയ്ക്ക് പോയി. പ്രേഗിലെ സര്വ്വകലാശാലയില് ചേര്ന്ന് വിശുദ്ധന് തത്വശാസ്ത്രവും, ദൈവശാസ്ത്രവും, സഭാനിയമങ്ങളും പഠിച്ചു. മാത്രമല്ല ദൈവശാസ്ത്രത്തിലും, സഭാ നിയമങ്ങളിലും വിശുദ്ധന് ഉന്നത ബിരുദവും കരസ്ഥമാക്കി. ചെറുപ്പത്തില് തന്നെ പുരോഹിതനാവുക എന്നത് വിശുദ്ധന്റെ ജീവിതാഭിലാഷമായിരുന്നു.
തുടര്ന്നു തന്റെ പഠനങ്ങളില് നിന്നും, നഗരത്തില് നിന്നും പിന്വാങ്ങി പ്രാര്ത്ഥനയും ഉപവാസവുമായി ഒരുമാസത്തോളം ഏകാന്ത ജീവിതം നയിച്ചുകൊണ്ട് ജോണ് ആത്മീയ ജീവിതത്തിനായി തയ്യാറെടുത്തു. വിശുദ്ധന്റെ മെത്രാന് തന്നെ വിശുദ്ധന് പുരോഹിത പട്ടം നല്കുകയും ‘ഔര് ലേഡി ഓഫ് ടെയിന്’ ഇടവകയുടെ ചുമതല ഏല്പ്പിക്കുകയും ചെയ്തു. അധികം താമസിയാതെ മുഴുവന് നഗരവും വിശുദ്ധനെ കേള്ക്കുവാനായി തടിച്ചുകൂടി. വിശുദ്ധന്റെ പ്രഭാഷണങ്ങള് കേള്ക്കുവാനായി ആയിരങ്ങള് അദ്ദേഹത്തിന്റെ ഇടവകയിലേക്ക് വരാന് തുടങ്ങി.
1378-ല് ചാള്സ് നാലാമന് ചക്രവര്ത്തി പ്രേഗില് വെച്ച് മരണപ്പെട്ടു. അദ്ദേഹത്തിന്റെ മകനായ വെന്സെസ്ലാവൂസ് തന്റെ പിതാവിന്റെ മരണത്തേതുടര്ന്ന് അധികാരത്തിലെത്തി. ചക്രവര്ത്തിയാകുമ്പോള് വെറും പതിനാറ് വയസ്സ് മാത്രം പ്രായമുണ്ടായിരുന്ന വെന്സെസ്ലാവൂസ് അധികാരത്തിനും, മുഖസ്തുതിയിലും മയങ്ങി ദുര്വൃത്തിപരമായ ജീവിതത്തിലേര്പ്പെടാന് തുടങ്ങി. അലസതയുടേയും, മദ്യപാനത്തിന്റേയും പര്യായമായി മാറി വെന്സെസ്ലാവൂസ്. വിശുദ്ധ വിശുദ്ധ ജോണിന്റെ പ്രശസ്തിയെ കുറിച്ച് കേട്ടറിഞ്ഞ അദ്ദേഹം, വിശുദ്ധനോട് തന്റെ രാജധാനിയില് അനുതാപത്തെകുറിച്ച് പ്രബോധനം നടത്തുവാന് ആവശ്യപ്പെട്ടു. എന്നാല് ഈ ദൗത്യം എത്രമാത്രം അപകടം നിറഞ്ഞതാണെന്ന് വിശുദ്ധനറിയാമായിരുന്നു. എന്നിരുന്നാലും വിശുദ്ധന് ആ ദൗത്യം സന്തോഷപൂര്വ്വം സ്വീകരിക്കുകയും പ്രഭാഷണം നടത്തുകയും ചെയ്തു.
അധികം താമസിയാതെ ചക്രവര്ത്തിയുള്പ്പെടെ സകലരുടേയും പ്രീതിക്ക് ജോണ് പാത്രമായി. തന്മൂലം ചക്രവര്ത്തി വിശുദ്ധന് ലെയിട്ടോമെറിറ്റ്സിലെ മെത്രാന് പദവി വാഗ്ദാനം ചെയ്തെങ്കിലും വിശുദ്ധന് ആ പദവി സ്വീകരിച്ചില്ല. പിന്നീട് വിച്ചെറാഡ്റ്റിലെ മെത്രാന് പദവിക്കടുത്ത സ്ഥാനം (പൊവോസ്റ്റ്ഷിപ്) വാഗ്ദാനം ചെയ്തുവെങ്കിലും അതും വിശുദ്ധന് നിരസിച്ചു. വിശുദ്ധന് രാജാവിന്റെ ദാനധര്മ്മപ്രവര്ത്തികളുടെ മേല്നോട്ടക്കാരനായി ചുമതലയേക്കുകയാണ് ചെയ്തത്. ഇത് വിശുദ്ധന് പാവപ്പെട്ടവരെ സഹായിക്കുന്നതിനും, നിരവധി ആത്മാക്കളെ ദൈവത്തിലേക്ക് തിരിക്കുന്നതിനും അവസരം നല്കി.
ചക്രവര്ത്തിനിയും ഭക്തയുമായിരുന്ന ജെയിനിന്റെ ആത്മീയ ഉപദേശകനും കൂടിയായിരുന്നു വിശുദ്ധന്. ചക്രവര്ത്തി അവളെ സ്നേഹിച്ചിരുന്നുവെങ്കിലും എളുപ്പം മനസ്സ് മാറുന്നവനായിരുന്നു. അതിനാല് തന്നെ ആ രാജകുമാരിക്ക് നിരവധിയായ സഹനങ്ങള് സഹിക്കേണ്ടതായി വന്നു. എന്നാല് അവള് വിശുദ്ധനെ അവളുടെ ആത്മീയ നിയന്താവായി സ്വീകരിച്ചതോടെ വിശുദ്ധനെ ഉപദേശങ്ങള് മൂലം അവള് തന്റെ സഹനങ്ങളെ ക്ഷമാപൂര്വ്വം സഹിക്കുവാന് പരിശീലിച്ചു.
മുന്പത്തേക്കാള് അധികമായി അവള് ഭക്തികാര്യങ്ങളില് ഏര്പ്പെട്ടു. മലിനമായ ഹൃദയം എല്ലാത്തിനേയും വിഷമയമാക്കും എന്ന് പറയുന്നത് പോലെ ചക്രവര്ത്തിനിയുടെ ഭക്തികാര്യങ്ങള് വെന്സെസ്ലാവൂസിനെ ദേഷ്യം പിടിപ്പിക്കുകയും അതേചൊല്ലി അവളോടു വാഗ്വാദത്തില് ഏര്പ്പെടുകയും ചെയ്തു. തന്നേക്കുറിച്ചുള്ള സ്വകാര്യകാര്യങ്ങള് അവള് അവളുടെ കുമ്പസാരത്തില് വിശുദ്ധന് വെളിപ്പെടുത്തികൊടുത്തിട്ടുണ്ടാവും എന്ന് കരുതിയ ചക്രവര്ത്തി ആ കുമ്പസാര രഹസ്യങ്ങള് എങ്ങിനേയെങ്കിലും വിശുദ്ധനില് നിന്നും അറിയുവാന് തീരുമാനിച്ചു.
ആദ്യം നേരിട്ടല്ലാതെ വിശുദ്ധനില് നിന്നും വിവരങ്ങള് ആരാഞ്ഞുവെങ്കിലും ഫലപ്രദമാകാത്തതിനാല് നേരിട്ട് ചോദ്യം ചെയ്യല് തുടങ്ങി. എന്നാല് വിശുദ്ധന് യാതൊന്നും വെളിപ്പെടുത്തിയില്ല. അതേതുടര്ന്ന് ക്രൂരനായ ആ ഭരണാധികാരി വിശുദ്ധനെ ക്രൂരമായി പീഡിപ്പിക്കുവാന് ഉത്തരവിട്ടു. ക്രൂരമായ പീഡനങ്ങള് ഏറ്റു വാങ്ങുമ്പോഴും വിശുദ്ധന് യേശുവിന്റെയും, മാതാവിന്റെയും നാമങ്ങള് ഉച്ചരിക്കുക മാത്രമാണ് ചെയ്തത്. തുടര്ന്ന് വിശുദ്ധനെ പകുതി മരിച്ച നിലയില് വെറുതെ വിട്ടു.
പൂര്വ്വാധികം ഭംഗിയായി വിശുദ്ധന് സുവിശേഷ പ്രഘോഷണം നടത്തി. ഒരിക്കല് ചക്രവര്ത്തി തന്റെ കൊട്ടാരത്തിന്റെ ജാലകത്തിലൂടെ നോക്കിയപ്പോള് പ്രേഗിലെ തെരുവിലൂടെ നടന്നു പോകുന്ന വിശുദ്ധനെ കണ്ടു. ഉടന്തന്നെ വിശുദ്ധനെ കൂട്ടികൊണ്ട് വരുവാന് ആളെ അയച്ചു. ഒന്നല്ലെങ്കില് ചകവര്ത്തിനിയുടെ കുമ്പസാര രഹസ്യം തന്നോട് വെളിപ്പെടുത്തുക, അല്ലെങ്കില് മരിക്കുവാന് തയ്യാറായി കൊള്ളുവാന് പറഞ്ഞു. എന്നാല് താന് മരിക്കുവാന് തയ്യാറായതായി വിശുദ്ധന് അറിയിച്ചു. തുടര്ന്ന് ചക്രവര്ത്തി വിശുദ്ധനെ കൈകാലുകള് ബന്ധിച്ച് മുള്ഡാ നദിയില് എറിയുവാന് ഉത്തരവിട്ടു. 1383 മെയ് 16നായിരുന്നു ഇത സംഭവിച്ചത്.
നദിയിലെ വെള്ളത്തില് ഒഴുകി കൊണ്ടിരുന്ന വിശുദ്ധന്റെ ശരീരത്തില് ഒരു ദിവ്യപ്രകാശം പതിഞ്ഞതായി പറയപ്പെടുന്നു. നദിയില് താന് കണ്ട ദിവ്യപ്രകാശത്തിന്റെ കാരണം ചക്രവര്ത്തിനി ആരാഞ്ഞപ്പോള് ചക്രവര്ത്തി പരിഭ്രാന്തനായി. രാവിലെതന്നെ വിശുദ്ധന്റെ കൊലപാതകത്തെ കുറിച്ച് ജനങ്ങള് അറിയുകയും ആ നഗരം മുഴുവനും നദിക്കരയില് തിങ്ങികൂടുകയും ചെയ്തു. പിന്നീട് വിശുദ്ധന്റെ ഭൗതീകശരീരം അടുത്തുള്ള ഒരു കത്രീഡലില് അടക്കം ചെയ്യുകയും ചെയ്തു. വിശുദ്ധന്റെ ഈ ശവകുടീരത്തില് രോഗശാന്തി ഉള്പ്പെടെയുള്ള നിരവധി അത്ഭുതങ്ങള് നടന്നിട്ടുള്ളതായി പറയപ്പെടുന്നു.
ഈ സംഭവത്തിനു ശേഷം ചക്രവര്ത്തിനി വളരെ പരിതാപകരമായ ജീവിതമായിരുന്നു നയിക്കുകയും 1387-ല് സമാധാനപൂര്വ്വം മരിക്കുകയും ചെയ്തു. ക്രൂരനായ ഭരണാധികാരിക്ക് അദ്ദേഹത്തിന്റെ തിന്മപ്രവര്ത്തിയുടെ ഫലം ലഭിക്കുകയും ചെയ്തു. ആഭ്യന്തര യുദ്ധത്തില് സാമ്രാജ്യം വിഭജിച്ചു പോവുകയും 1400-ല് ചക്രവര്ത്തി ഭരണത്തില് നിന്നും നിഷ്കാസിതനാവുകയും ചെയ്തു.
ചുരുങ്ങിയ വര്ഷങ്ങള്ക്കുളില് വിശുദ്ധന്റെ ശവകുടീരത്തില് നിരവധി അത്ഭുതങ്ങള് നടക്കുകയുണ്ടായി. ചക്രവര്ത്തിമാരായിരുന്ന ഫെര്ഡിനാന്റ് രണ്ടാമനും, മൂന്നാമനും ജോണ് നെപോമുസെന്റെ വിശുദ്ധീകരണത്തിനു വേണ്ടി ശ്രമങ്ങള് ആരംഭിച്ചു. ചാള്സ് ആറാമന്റെ കാലത്താണ് ജോണ് നെപോമുസെനെ വിശുദ്ധനായി പ്രഖ്യാപിക്കുന്നത്. 1719-ല് വിശുദ്ധന്റെ കല്ലറ തുറക്കുകയുണ്ടായി. 330 വര്ഷങ്ങള്ക്ക് ശേഷവും വിശുദ്ധന്റെ ശരീരത്തിലെ എല്ലുകള്ക്ക് യാതൊരു കുഴപ്പവും കൂടാതെയിരിക്കുന്നതായി കണ്ടു.
വിശുദ്ധന്റെ നാക്കിനും യാതൊരു കുഴപ്പവുമുണ്ടായിരിന്നില്ല. ബൊഹേമിയയില് വിശുദ്ധന്റെ മരണം മുതല്ക്കേ തന്നെ അദ്ദേഹത്തെ ഒരു രക്തസാക്ഷിയായി ആദരിച്ചു വന്നിരുന്നു. വിശുദ്ധന്റെ പേരിലുള്ള അത്ഭുതങ്ങള് നിയമപരമായി വാസ്തവമാണെന്ന് തെളിയുകയും തുടര്ന്ന് ബെനഡിക്ട് പതിമൂന്നാമന് ആദേഹത്തെ വിശുദ്ധനായി പ്രഖ്യാപിക്കുകയും ചെയ്തു.
2 weeks ago | [YT] | 397
View 6 replies
SVM KARUKUTTY
അനുദിനവിശുദ്ധര് : മെയ് 15
കൃഷിക്കാരനായിരുന്ന വിശുദ്ധ ഇസിദോര്
1070-ല് സ്പെയിനിലെ മാഡ്രിഡിലെ ദരിദ്രരായ കൃഷിക്കാരുടെ കുടുംബത്തിലായിരുന്നു വിശുദ്ധ ഇസിദോര് ജനിച്ചത്. സെവില്ലെയിലെ പ്രസിദ്ധനായ മെത്രാപ്പോലീത്തയുടെ ബഹുമാനാര്ത്ഥമാണ് വിശുദ്ധന്, ഇസിദോര് എന്ന പേര് ലഭിക്കുവാന് കാരണം. മാഡ്രിഡിനു പുറത്തുള്ള ടോറെഗാലഗൂനായിലുള്ള ധനികനായ ജോണ് ഡി വെര്ഗാസിന്റെ കൃഷിതോട്ടത്തിലെ ദിവസ ജോലിക്കാരനായിരുന്നു ഇസിദോര്. ദരിദ്രയായ മരിയ ഡി ലാ കബെസാ എന്ന പെണ്കുട്ടിയേയായിരുന്നു വിശുദ്ധന് വിവാഹം ചെയ്തിരുന്നത്. അവര്ക്ക് ഒരു മകന് പിറന്നെങ്കിലും ചെറുപ്പത്തില് തന്നെ ആ കുട്ടി മരണപ്പെട്ടു. അതിനു ശേഷം ആ ദമ്പതികള് ദൈവസേവനത്തില് മുഴുകി ജീവിക്കുവാന് തീരുമാനിച്ചു. ഇസിദോറിന്റെ ജീവിതം വളരെ ലളിതമായിരുന്നു. കാരുണ്യത്തിന്റേയും, വിശ്വാസത്തിന്റേയും ഒരു മാതൃകയായിരുന്നു വിശുദ്ധന്റെ ജീവിതം. ജോലിചെയ്തുകൊണ്ടിരിക്കുമ്പോഴും പ്രാര്ത്ഥിക്കുക, ഒഴിവു സമയങ്ങളില് ദേവാലയങ്ങള് സന്ദര്ശിക്കുക, തന്റെ ഭക്ഷണം പാവപ്പെട്ടവരുമായി പങ്ക് വെക്കുക തുടങ്ങിയവ വിശുദ്ധന്റെ പതിവായിരുന്നു.
ഇസിദോര് വളരെയേറെ പരിശ്രമശാലിയായിരുന്നു, പക്ഷേ ഒരിക്കല് വിശുദ്ധനെക്കുറിച്ചൊരു പരാതി അദ്ദേഹത്തിന്റെ തൊഴില്ദാതാവിന്റെ പക്കല് എത്തി. അതിരാവിലെ വിശുദ്ധ കുര്ബ്ബാനക്ക് പള്ളിയില് പോകുന്നതിനാല് വിശുദ്ധന് എല്ലാ ദിവസവും രാവിലെ വൈകിയാണ് ജോലിക്കെത്തുന്നത് എന്നായിരുന്നു പരാതി. ഇതിനെ കുറിച്ച് ചോദിച്ചപ്പോള് വിശുദ്ധന് അത് നിഷേധിക്കാതെ ഇപ്രകാരം മറുപടി കൊടുത്തു : “സര്, ഞാന് എന്റെ ജോലിസ്ഥലത്ത് മറ്റുള്ള ജോലിക്കാരില് നിന്നും കുറച്ച് വൈകിയാണ് വരുന്നതെന്ന കാര്യം സത്യമാണ്. പ്രാര്ത്ഥനക്ക് വേണ്ടി ഞാന് ചിലവാക്കുന്ന ആ കുറച്ച് മിനിട്ടുകള്ക്ക് പകരം എന്നാല് കഴിയും വിധം ഞാന് കൂടുതലായി ജോലി ചെയ്യാറുണ്ട്. എന്റെ ജോലിയും മറ്റുള്ളവരുടെ ജോലിയും തമ്മില് താരതമ്യപ്പെടുത്തി നോക്കുവാന് ഞാന് അങ്ങയോടു അപേക്ഷിക്കുന്നു. ചെറുതായി പോലും ഞാന് അങ്ങയെ വഞ്ചിച്ചിട്ടുള്ളതായി അങ്ങ് കണ്ട്പിടിക്കുകയാണെങ്കില്, എന്റെ സ്വകാര്യ ശേഖരത്തില് നിന്നും അതിനു വേണ്ട നഷ്ടപരിഹാരം ഞാന് ചെയ്തുകൊള്ളാം.”
തൊഴിലുടമ അദ്ദേഹത്തോട് യാതൊന്നും തന്നെ പറഞ്ഞില്ല. എന്നിരുന്നാലും അദ്ദേഹം ഇക്കാര്യത്തില് സംശയാലുവായിരുന്നു. ഇതിന്റെ സത്യം കണ്ട്പിടിക്കുവാനായി അദ്ദേഹം ഒരുദിവസം അതിരാവിലെ എഴുന്നേറ്റ് ദേവാലയത്തിന്റെ പുറത്ത് ഒളിച്ചു നിന്നു. ഈ സമയത്ത് വിശുദ്ധ ഇസിദോര് അവിടെ വരികയും ദേവാലയത്തിലേക്ക് പ്രവേശിക്കുകയും ചെയ്തു. കുര്ബ്ബാന കഴിഞ്ഞ ഉടന്തന്നെ അദ്ദേഹം തന്റെ ജോലിസ്ഥലത്തേക്ക് പോയി. അദ്ദേഹത്തെ പിന്തുടര്ന്ന മുതലാളി വിശുദ്ധന് നുകമെടുത്തുകൊണ്ട് പാടത്തേക്ക് പോകുന്നത് കണ്ടു.
അദ്ദേഹം വിശുദ്ധനെ അഭിമുഖീകരിക്കുവാനായി തുനിഞ്ഞപ്പോള്, മഞ്ഞ് മൂടിയ ആ പ്രഭാതകിരണത്തിലൂടെ ഒരു വെളുത്തകാളയില് പൂട്ടിയിരിക്കുന്ന നുകം വയലിലൂടെ അങ്ങോട്ടും ഇങ്ങോട്ടും ചലിക്കുന്നതായി താന് കണ്ടുവെന്ന് അദ്ദേഹത്തിന് തോന്നി. അമ്പരന്നുപോയ അദ്ദേഹം വയലിനു നെരെ ഓടിയെങ്കിലും വിശുദ്ധ ഇസിദോറിനേയും അദ്ദേഹത്തിന്റെ നുകത്തേയും മാത്രമാണ് കാണുവാന് സാധിച്ചത്.
ഇതിനെക്കുറിച്ച് അദ്ദേഹം വിശുദ്ധനോട് ആരാഞ്ഞപ്പോള് വിശുദ്ധന് പറഞ്ഞു : “സര്, ഞാന് ഒറ്റക്കാണ് ജോലിചെയ്യുന്നത്, എന്റെ ശക്തിക്കായി ഞാന് ആശ്രയിക്കുന്ന ദൈവമല്ലാതെ മറ്റാരേയും ഞാന് അറിയുകയുമില്ല” ഈ കഥ പരക്കെ വ്യാപിച്ചു. മാലാഖമാര് പോലും വിശുദ്ധന്റെ ജോലിയില് സഹായിക്കത്തക്കവിധം മഹത്തായിരുന്നു വിശുദ്ധന്റെ ദിവ്യത്വം. വിശുദ്ധന് ദരിദ്രനായിരുന്നുവെങ്കിലും തനിക്ക് സാധിക്കുന്ന പോലെ ദാനധര്മ്മം ചെയ്യുമായിരുന്നു, പാവപ്പെട്ട ഉഴവുകാരനായിരുന്നുവെങ്കിലും അദ്ദേഹത്തിന്റെ സംസാരം നേരുള്ളതും, വ്യക്തവുമായിരുന്നു.
ശക്തമായ മഞ്ഞുള്ള ഒരു ദിവസം വിശുദ്ധന് തന്റെ ഭാര്യ ശേഖരിച്ച ധാന്യം കുത്തിക്കുവാനായി മില്ലിലേക്ക് പോവുകയായിരുന്നു. അപ്പോള് തണുത്തുറഞ്ഞ നിലത്ത് ഭക്ഷണത്തിനായി വൃഥാശ്രമിക്കുന്ന ഒരു കൂട്ടം പ്രാവുകളെ വിശുദ്ധന് കണ്ടു. ആ പക്ഷികളോട് ദയ തോന്നിയ വിശുദ്ധന് കണ്ടു നിന്നവരുടെ പരിഹാസത്തെ വകവെക്കാതെ തന്റെ ചാക്കിലെ പകുതിയോളം ധാന്യം നിലത്ത് വിതറി. പക്ഷേ അദ്ദേഹം മില്ലിലെത്തിയപ്പോള് അദ്ദേഹത്തിന്റെ ചാക്ക് നിറഞ്ഞിരുന്നു, നിലത്ത് വീണ ധാന്യങ്ങള് പ്രതീക്ഷിച്ചതിലും ഇരട്ടി ഫലം പുറപ്പെടുവിക്കുകയും ചെയ്തു.
ഇത്തരം ചെറിയ പ്രവര്ത്തികളെ അദ്ദേഹത്തിന്റെ ജീവിതത്തില് നമുക്ക് കാണുവാന് കഴിയുകയുള്ളൂ. വിശുദ്ധന് ഏതെങ്കിലും രൂപത ഭരിച്ചിരുന്ന മെത്രാനോ, അല്ലെങ്കില് തന്റെ വിശ്വാസത്തിനായി രക്തസാക്ഷിത്വം വരിച്ച രക്തസാക്ഷിയോ അല്ലായിരുന്നു, വയലുകളിലും, തോട്ടങ്ങളിലും ദൈവത്തെ ശരിയായ വിധത്തില് സേവിച്ച ഒരു ദൈവഭക്തനായിരുന്നു വിശുദ്ധ ഇസിദോര്. 1130-ലാണ് വിശുദ്ധന് കര്ത്താവില് അന്ത്യനിദ്ര പ്രാപിക്കുന്നത്.
വിശുദ്ധന്റെ മരണത്തിനു ശേഷം അദ്ദേഹത്തിന്റെ പുണ്യവതിയായ പത്നി ഏതാണ്ട് 40 വര്ഷത്തോളം ജീവിച്ചിരുന്നു. പിന്നീട് വിശുദ്ധന്റെ ഭൗതീകശരീരം ഒരു അള്ത്താരയിലേക്ക് മാറ്റി. വിശുദ്ധ ഇസിദോറിന്റെ മദ്ധ്യസ്ഥതയില് നടന്ന അത്ഭുതങ്ങള് മൂലം അദ്ദേഹത്തിന്റെ പറ്റി പരെക്കെ വ്യാപിച്ചു. 1211-ല് കാസ്റ്റിലെയിലെ രാജാവായ അല്ഫോണ്സസിന് വിശുദ്ധന് ഒരു ദര്ശനത്തില് പ്രത്യക്ഷപ്പെടുകയും അറിയപ്പെടാത്ത ഒരു യുദ്ധമാര്ഗ്ഗം കാണിച്ചുകൊടുക്കുകയും അതുപയോഗിച്ച് അദ്ദേഹം മൂറുകളെ പരാജയപ്പെടുത്തിയതായും പറയപ്പെടുന്നു.
രാജാവായ ഫിലിപ്പ് മൂന്നാമന്റെ നിര്ബന്ധപ്രകാരമാണ് ഇസിദോറിന്റെ വിശുദ്ധീകരണ നടപടികള് ആരംഭിച്ചത്. വിശുദ്ധന്റെ മാധ്യസ്ഥം മൂലം ഫിലിപ്പ് മൂന്നാമന് രാജാവിന് മാരകമായ രോഗത്തില് നിന്നും രോഗശാന്തി ലഭിച്ചിട്ടുണ്ടെന്ന് ചരിത്രകാരന്മാര് സാക്ഷ്യപ്പെടുത്തുന്നു. 1622-ലാണ് ഇസിദോറിനെ വിശുദ്ധനായി പ്രഖ്യാപിച്ചത്.
ആദ്യകാലങ്ങളില് മെയ് 10നും, മാര്ച്ച് 22നുമായിരുന്നു വിശുദ്ധന്റെ തിരുനാള് ആഘോഷിച്ചിരുന്നത്. അമേരിക്കയില് ഒക്ടോബര് 25നാണ് വിശുദ്ധന്റെ തിരുനാള് ആഘോഷിക്കുന്നത്. സ്പെയിനിലെ മാഡ്രിഡില് വിശുദ്ധ ഇസിദോറിന്റെ തിരുനാള് ദിവസത്തില് പള്ളി മണികള് മുഴക്കുകയും, തെരുവുകള് അലങ്കരിക്കുകയും വിശുദ്ധന്റെ ആദരവിനായി പ്രദിക്ഷിണങ്ങള് സംഘടിപ്പിക്കുകയും ചെയ്യുന്നു.
ചിത്രകലകളില് വിശുദ്ധനെ പലപ്പോഴും അരിവാളും ചോളത്തിന്റെ കതിര്ക്കുലയുമായി നില്ക്കുന്ന ഒരു കര്ഷകനായിട്ടും, അരിവാളും വടിയും പിടിച്ചുകൊണ്ട് നില്ക്കുന്നതായും, അദ്ദേഹത്തിന് വേണ്ടി നിലമുഴുത്ത മാലാഖയായും, കിണറിന്റെ സമീപം നിന്ന് കുട്ടികള്ക്ക് ജപമാല നല്കുന്നതായും തുടങ്ങി നിരവധി രീതികളില് ചിത്രീകരിച്ചിട്ടുള്ളതായി കാണാം. സ്പാനിഷ് ചിത്രകലയില് വിശുദ്ധന്റെ അടയാളമായി കാണിച്ചിട്ടുള്ളത് മണ്വെട്ടിയും, നുകവുമാണ്.
2 weeks ago | [YT] | 390
View 12 replies
SVM KARUKUTTY
അനുദിനവിശുദ്ധര് : മെയ് 14
വിശുദ്ധ മത്തിയാസ്
നമ്മുടെ രക്ഷകനായ യേശുവിനെ ആദ്യമായി അനുഗമിച്ചവരില്, യേശുവിന്റെ 72 അനുയായികളില് ഒരാളാണ് വിശുദ്ധ മത്തിയാസ്. ഉത്ഥാനംവരെയുള്ള യേശുവിന്റെ എല്ലാ ദിവ്യപ്രവര്ത്തികള്ക്കും വിശുദ്ധ മത്തിയാസ് ദൃക്സാക്ഷിയായിരുന്നു. വഞ്ചകനായ യൂദാസിന്റെ ഒഴിവ് നികത്തുന്നതിനായി ആ സ്ഥാനത്തേക്ക് മറ്റൊരാള് വരും എന്ന് ദാവീദ് പ്രവചിച്ചത് വിശുദ്ധ മത്തിയാസിനെക്കുറിച്ചായിരുന്നു. യേശുവിന്റെ ഉത്ഥാനത്തിനും, പരിശുദ്ധാത്മാവിന്റെ ആഗമനത്തിനും ഇടക്കുള്ള കാലയളവില് അപ്പസ്തോലിക സമൂഹത്തിന് യേശുവിനാല് നിശ്ചയിക്കപ്പെട്ട 12 എന്ന അംഗ സംഖ്യ തികക്കേണ്ടത് ആവശ്യമായിരുന്നു. ആ നറുക്ക് വീണത് വിശുദ്ധ മത്തിയാസിനായിരുന്നു. വിശുദ്ധന് തന്റെ അപ്പസ്തോല സഹോദരന്മാര്ക്കൊപ്പം ജെറൂസലേമിലെ പീഡനങ്ങള് സഹിക്കുന്നതില് പങ്കാളിയായി.
ക്രിസ്തുവിന്റെ പ്രതിനിധികള്ക്ക് ലോകത്തിന്റെ പല ഭാഗങ്ങളിലേക്കായി പിരിയേണ്ട സമയം വന്നപ്പോള് വിശുദ്ധന് തനിക്ക് പോകേണ്ടതായ രാജ്യങ്ങളിലേക്ക് പോയി. ഐതിഹ്യമനുസരിച്ച് കാപ്പാഡോസിയയിലേക്കും, കാസ്പിയന് സമുദ്രത്തിന്റെ തീരത്തുള്ള പ്രവിശ്യകളിലേക്കുമാണ് വിശുദ്ധന് പോയത്. മറ്റ് അപ്പസ്തോലന്മാരുടെ തിരുനാളുകള്ക്ക് ആവശ്യമായ വിവരങ്ങള് ലഭ്യമായിരിക്കുന്നത് പോലെ വിശുദ്ധ മത്തിയാസിന്റെ നന്മയേയും, പ്രയത്നങ്ങളെയും, സഹനങ്ങളെയും കുറിച്ചുള്ള വിവരങ്ങള് നമുക്ക് ലഭ്യമല്ല.
അലെക്സാണ്ട്രിയായിലെ ക്ലെമന്റ്, വിശുദ്ധന് പറഞ്ഞിട്ടുള്ളതായ ചില കാര്യങ്ങള് രേഖപ്പെടുത്തിയിട്ടുണ്ട്. ഇതില് ഒരെണ്ണം ഇക്കാലത്തെ ആത്മീയതക്ക് വളരെയേറെ യോജിച്ചതാണ്. "സൃഷ്ടാവ് സ്ഥാപിച്ച വ്യവസ്ഥകളെ പാപം താറുമാറാക്കി. അത് മനുഷ്യനെ തരംതാഴ്ത്തുന്ന കാര്യങ്ങളില് ഇഴയുവാന് പ്രേരണ നല്കുന്നു. സൃഷ്ടിയുടെ സമയത്ത് ദൈവം നമുക്ക് നല്കിയ ദൈവീക മഹത്വത്തിലേക്ക് തിരികെ വരുവാനുള്ള ഏക മാര്ഗ്ഗം നിര്ബന്ധപൂര്വ്വം ശരീരത്തെ ആത്മാവിനു അടിയറവ് വെക്കുക എന്നതാണ്. പക്ഷെ ആത്മാവും മൂലപാപവും കാരണം അത് വികലമാക്കപ്പെട്ടിരിക്കുന്നു. അവളുടെ പ്രവണതകള് തിന്മയിലേക്ക് ചാഞ്ഞുകൊണ്ടിരിക്കുന്നു. ആഴമായ വിശ്വാസവും അറിവുമാണ് ഇതിന് പ്രതിവിധി".
2 weeks ago | [YT] | 363
View 5 replies
SVM KARUKUTTY
അനുദിനവിശുദ്ധര് : മെയ് 13
വിശുദ്ധ ജോണ് ദി സൈലന്റ്
നിശബ്ദതയോടുള്ള സ്നേഹം കൊണ്ടാണ് വിശുദ്ധ ജോണിന് പേരിനോട് കൂടി 'ദി സൈലന്റ്' എന്ന വിശേഷണം ലഭിക്കുവാന് കാരണം. 454-ല് അര്മേനിയായിലെ നിക്കോപോളീസിലാണ് വിശുദ്ധന് ജനിച്ചത്. ആ രാജ്യത്തെ ശ്രേഷ്ഠരായ ഗവര്ണര്മാരുടേയും, ജെനറല് മാരുടേയും വംശാവലിയില്പ്പെട്ടവരായിരുന്നു വിശുദ്ധന്റെ മാതാപിതാക്കള്. തങ്ങളുടെ മകന് ദൈവീക വിദ്യാഭ്യാസം നല്കുക എന്നതാണ് മറ്റെന്തിനേക്കാളും പരമപ്രധാനമായി അവര് കരുതിയത്. തന്റെ മാതാപിതാക്കളുടെ മരണത്തിനു ശേഷം വിശുദ്ധന് നിക്കോപോളീസിലെ തന്റെ ഭൂമിയുടെ ഒരു ഭാഗത്തായി പരിശുദ്ധ കന്യകയുടെ നാമധേയത്തില് ഒരു ദേവാലയവും, ഒരാശ്രമവും പണികഴിപ്പിച്ചു. ഈ ആശ്രമത്തില് വിശുദ്ധന് പത്തോളം വിശ്വാസികളായ സഹചാരികള്ക്കൊപ്പം ഏകാന്തവാസമാരംഭിച്ചു.
അപ്പോള് വിശുദ്ധന് വെറും 18 വയസ്സ് മാത്രമായിരുന്നു പ്രായം. തന്റെ ആത്മാവിന്റെ വിശുദ്ധിയും ആത്മാക്കളുടെ മോക്ഷവുമായിരുന്നു വിശുദ്ധന്റെ ഏക ലക്ഷ്യം. തന്റെ സഹനങ്ങളും കഷ്ടതകളും വളരെ സന്തോഷപൂര്വ്വം വിശുദ്ധന് സ്വീകരിച്ചു. നാവ് കൊണ്ട് പാപം ചെയ്യാതിരിക്കുവാന് മാത്രമല്ല, തന്റെ എളിമയും, പ്രാര്ത്ഥനയോടുമുള്ള അടങ്ങാത്ത ആഗ്രഹവും മൂലം വിശുദ്ധന് വളരെകുറച്ചു മാത്രമേ സംസാരിച്ചിരുന്നുള്ളു. വിശുദ്ധന്റെ ശാന്തതയും, വിവേകവും, ഭക്തിയും സകലരുടേയും സ്നേഹം വിശുദ്ധന് നേടികൊടുത്തു.
482-ല് വിശുദ്ധന് 28 വയസ്സായപ്പോള് സെബാസ്റ്റേയിലെ മെത്രാപ്പോലീത്തയുടെ നിര്ദ്ദേശപ്രകാരം വിശുദ്ധന് അര്മേനിയായിലെ കൊളോണിയനിലെ മെത്രാനായി അഭിഷിക്തനായി. മെത്രാനായി നിയമിതനായെങ്കിലും വിശുദ്ധന് തന്റെ ആശ്രമജീവിതത്തിലെ നിയമങ്ങള് ഉപേക്ഷിച്ചിരുന്നില്ല. രാജധാനിയില് ഉന്നത പദവികളിലിരുന്ന വിശുദ്ധന്റെ സഹോദരനും അനന്തരവനും വിശുദ്ധന്റെ പാത പിന്തുടര്ന്നുകൊണ്ട്, ഭൗതീകസുഖങ്ങള് ഉപേക്ഷിച്ച് ആത്മീയജീവിതം സ്വീകരിച്ചു.
ഒരു മെത്രാനെന്ന നിലയില് ഒമ്പത് വര്ഷത്തോളം വിശുദ്ധന് തന്റെ ചുമതലകള് ഭംഗിയായി നിര്വഹിച്ചു. തനിക്കുള്ളതെല്ലാം വിശുദ്ധന് പാവങ്ങള്ക്ക് വീതിച്ചുകൊടുത്തു. തന്റെ കുഞ്ഞാടുകള്ക്ക് സുവിശേഷം പ്രഘോഷിക്കുകയും, അതനുസരിച്ച് ജീവിക്കുവാനുള്ള മാതൃക സ്വന്തം ജീവിതം കൊണ്ട് വിശുദ്ധന് അവര്ക്ക് കാണിച്ചുകൊടുക്കുകയും ചെയ്തു. ഒരു രാത്രി വിശുദ്ധന് പ്രാര്ത്ഥിച്ചുകൊണ്ടിരിക്കുമ്പോള് അദ്ദേഹത്തിന്റെ മുന്പിലായി ഒരു തിളങ്ങുന്ന കുരിശ് പ്രത്യക്ഷപ്പെടുകയും, “നീ രക്ഷിക്കപ്പെടുവാന് ആഗ്രഹിക്കുന്നുണ്ടെങ്കില് ഈ പ്രകാശത്തെ പിന്തുടരുക” എന്നൊരു ശബ്ദവും കേള്ക്കുകയും ചെയ്തുവെന്നും പറയപ്പെടുന്നു. ആ കുരിശ് വിശുദ്ധന്റെ മുന്പിലൂടെ ചലിക്കുകയും, അവസാനം വിശുദ്ധ സാബായുടെ ആശ്രമകുടീരത്തിനെ കാണിച്ചുകൊടുക്കുകയും ചെയ്തതായി വിശുദ്ധന്റെ ജീവചരിത്ര രചയിതാവ് സാക്ഷ്യപ്പെടുത്തുന്നു. ഇതേ തുടര്ന്ന് വിശുദ്ധന് തന്റെ മെത്രാന് പദവി ഉപേക്ഷിച്ച് പലസ്തീനായിലേക്ക് പോകുന്ന ഒരു കപ്പലില് കയറി.
ആദ്യം അദ്ദേഹം ജെറൂസലേമിലേക്കാണ് പോയത്, പിന്നീട് അതിനു സമീപത്തുള്ള വിശുദ്ധ സാബായുടെ ആശ്രമത്തിലേക്കും. അപ്പോള് വിശുദ്ധന് 38 വയസ്സായിരുന്നു പ്രായം. വിശുദ്ധ സാബാ, ജോണിനെ വെള്ളം കോരുവാനും, കല്ല് ചുമക്കുവാനും, പുതിയ ആശുപത്രിയുടെ പണികളില് മുഴുകിയിരിക്കുന്ന തൊഴിലാളികളെ സഹായിക്കുവാനുമാണ് ചുമതലപ്പെടുത്തിയത്. അതിനു ശേഷം അതിഥികളെ സ്വീകരിക്കുകയും അവരെ സല്ക്കരിക്കുകയും ചെയ്യുന്ന ജോലിക്കായി വിശുദ്ധനെ നിയമിച്ചു. ആ ദൈവീക മനുഷ്യന് എല്ലാവരേയും ക്രിസ്തുവിനെപോലെ കരുതികൊണ്ട് സ്വീകരിക്കുകയും സേവിക്കുകയും ചെയ്തു. ഇതിനോടകം തന്നെ തന്റെ സന്യസാര്ത്ഥി ആശ്രമജീവിതത്തിന് പറ്റിയ ആളാണെന്ന കാര്യം വിശുദ്ധ സാബാക്ക് മനസ്സിലാവുകയും ജോണിനെ അവന്റെ ആത്മീയ ദൈവനിയോഗത്തിനായി അനുവദിക്കുകയും ചെയ്തു.
സ്വന്തമായി ഒരു ആശ്രമകുടീരം തന്നെ അദ്ദേഹം വിശുദ്ധന് നല്കി. അവസാനം വിശുദ്ധന്റെ യോഗ്യതയും വിശുദ്ധിയും മനസ്സിലാക്കിയ വിശുദ്ധ സാബാ ജോണിനെ പുരോഹിത പട്ട സ്വീകരണത്തിനായി പാത്രിയാര്ക്കീസായിരുന്ന ഏലിയാസിന്റെ പക്കലേക്കയച്ചു. പുരോഹിതനാകുന്നതിനു മുന്പ് വിശുദ്ധന് പാത്രിയാര്ക്കീസിനോട് താന് ഒരു മെത്രാനായിരുന്നുവെന്ന കാര്യം അറിയിച്ചു. ഇത് കേട്ട് അമ്പരന്നു പോയ പാത്രിയാര്ക്കീസ് വിശുദ്ധ സാബായെ വിളിച്ച് 'ജോണ് തന്നോടു വെളിപ്പെടുത്തിയ ചിലകാര്യങ്ങളുടെ അടിസ്ഥാനത്തില് തനിക്കദ്ദേഹത്തിന് പുരോഹിത പട്ടം നല്കുവാന് കഴിയുകയില്ല എന്നറിയിച്ചു. വിശുദ്ധ സാബായാകട്ടെ ജോണിനെ വിളിച്ച് ഇക്കാര്യങ്ങള് തന്നില് നിന്നും മറച്ചുവെച്ചതില് പരാതിപ്പെട്ടു. തന്റെ രഹസ്യം പുറത്തായതിനാല് വിശുദ്ധന് ആ ആശ്രമം വിട്ട് പോകുവാനൊരുങ്ങിയെങ്കിലും വിശുദ്ധ സാബാ ഈ രഹസ്യം ഇനി ആരോടും വെളിപ്പെടുത്തുകയില്ല എന്ന വ്യവസ്ഥയില് അദ്ദേഹത്തെ അവിടെ തുടരുവാന് അനുവദിച്ചു.
അതിനു ശേഷം വിശുദ്ധന് ആരോടും സംസാരിക്കാതെ ഒരു മുറിയില് ഒറ്റക്ക് കഴിഞ്ഞു. തനിക്ക് വേണ്ട സാധനങ്ങള് തരുവാന് വരുന്നവരോടല്ലാതെ മറ്റാരോടും വിശുദ്ധന് സംസാരിക്കാറില്ലായിരുന്നു. ആ ആശ്രമത്തിലെ കുഴപ്പക്കാരായ ചില അന്തേവാസികള് വിശുദ്ധ സാബാക്കെതിരായി തിരിയുകയും അദ്ദേഹത്തിന് ആശ്രമം വിട്ട് പോകേണ്ടതായി വരികയും ചെയ്തു. ഇതില് യാതൊരു പങ്കുമില്ലാതിരുന്ന വിശുദ്ധ ജോണ് സമീപത്തുള്ള ഒരു വനത്തില് പോയി നിശബ്ദമായി ജീവിച്ചു. ഏതാണ്ട് ആറു വര്ഷത്തോളം വിശുദ്ധന് ആ നിശബ്ദ ജീവിതം നയിച്ചു.
പിന്നീട് 510-ല് വിശുദ്ധ സാബാ ആശ്രമത്തില് തിരികെയെത്തിയപ്പോള് അദ്ദേഹം വിശുദ്ധ ജോണിനെ വനത്തില് നിന്നും ആശ്രമത്തിലേക്ക് കൂട്ടികൊണ്ട് വന്നു. ഏതാണ്ട് 40 വര്ഷത്തോളം വിശുദ്ധന് ആ ആശ്രമത്തിലെ തന്റെ മുറിയില് നിശബ്ദനായി താമസിച്ചു. എന്നിരുന്നാലും തന്നില് ശരണം പ്രാപിക്കുന്നവര്ക്ക് വേണ്ട ഉപദേശങ്ങള് നല്കുവാന് വിശുദ്ധന് ഒരിക്കലും മടികാണിച്ചിരുന്നില്ല. അപ്രകാരം ശരണം പ്രാപിച്ചവരില് പണ്ഡിതനും, സന്യാസിയുമായിരുന്ന സിറിലും ഉണ്ടായിരുന്നു. അദ്ദേഹമാണ് വിശുദ്ധന്റെ ജീവചരിത്രം എഴുതിയത്.
ഇതില് വിശുദ്ധ സിറില് ഒരു സംഭവം വിവരിച്ചിരിക്കുന്നു: തനിക്ക് 16 വയസ്സ് പ്രായമുള്ളപ്പോള് അദ്ദേഹം വിശുദ്ധ ജോണിന്റെ പക്കല് ചെല്ലുകയും തന്റെ ജീവിതത്തില് തിരഞ്ഞെടുക്കേണ്ട വഴിയേക്കുറിച്ച് വിശുദ്ധനോട് ഉപദേശം ആരായുകയും ചെയ്തു. അപ്പോള് വിശുദ്ധന് 90 വയസ്സായിരുന്നു പ്രായം. വിശുദ്ധ ഇയൂത്തിമിയൂസിന്റെ ആശ്രമത്തില് ചേരുവാന് അദ്ദേഹം സിറിലിനെ ഉപദേശിച്ചു. എന്നാല് സിറിലിനാകട്ടെ ജോര്ദാന്റെ തീരത്തുള്ള ഏതെങ്കിലും ആശ്രമത്തില് ചേരുവാനായിരുന്നു ആഗ്രഹം. സിറില് തന്റെ ഇഷ്ടപ്രകാരമുള്ള ആശ്രമത്തില് ചേര്ന്നപ്പോഴേക്കും അദ്ദേഹത്തിന് കലശലായ രോഗം പിടിപ്പെട്ടു.
ദിനം പ്രതി അദ്ദേഹത്തിന്റെ അവസ്ഥ വഷളായികൊണ്ടിരുന്നു. വിശുദ്ധ ജോണിന്റെ ഉപദേശം സ്വീകരിക്കാഞ്ഞതില് അദ്ദേഹത്തിന് പശ്ചാത്താപം തോന്നി. ആ രാത്രിയില് വിശുദ്ധ ജോണ് അദ്ദേഹത്തിന് ഉറക്കത്തില് പ്രത്യക്ഷപ്പെടുകയും വിശുദ്ധ ഇയൂത്തിമിയൂസിന്റെ ആശ്രമം അറ്റകുറ്റപണികള് നടത്തുകയാണെങ്കില് അവനു തന്റെ പഴയ ആരോഗ്യം വീണ്ടുകിട്ടും എന്നറിയിക്കുകയും ചെയ്തു. സിറില് അപ്രകാരം പ്രവര്ത്തിക്കുകയും ചെയ്തു.
മറ്റൊരവസരത്തില്, സിറില് വിശുദ്ധ ജോണുമായി സംസാരിച്ചുകൊണ്ടിരിക്കെ ജോര്ജ് എന്ന് പേരായ ഒരു മനുഷ്യന് തന്റെ പിശാച് ബാധിതനായ തന്റെ മകനെയും കൊണ്ട് വിശുദ്ധന്റെ പക്കലെത്തി. വിശുദ്ധന് ആ ബാലന്റെ നെറ്റിയില് വിശുദ്ധ തൈലം കൊണ്ട് കുരിശടയാളം വരക്കുകയും ഉടനടി തന്നെ ആ ബാലന് സുഖം പ്രാപിക്കുകയും ചെയ്തതായും സിറില് വിവരിക്കുന്നു. കൂടാതെ മതവിരുദ്ധവാദിയായ കോണ്സ്റ്റാന്റിനോപ്പിളിലെ ഒരു പ്രഭുവിനെ വിശുദ്ധന് അതി ഭക്തനായ കത്തോലിക്കാ വിശ്വാസിയാക്കി മാറ്റുകയുണ്ടായി. തന്റെ ജീവിത മാതൃകകൊണ്ടും ഉപദേശങ്ങള്കൊണ്ട് വിശുദ്ധന് ജോണ് നിരവധി ആളുകളെ ദൈവത്തിങ്കലേക്ക് തിരിച്ചിട്ടുണ്ടെന്ന് ദൈവശാസ്ത്ര പണ്ഡിതര് പറയുന്നു.
2 weeks ago | [YT] | 398
View 3 replies
SVM KARUKUTTY
അനുദിനവിശുദ്ധര് : മെയ് 12
വി. പാന്ക്രസ് (290- 304)
പതിനാലാം വയസില് മാതാപിതാക്കളെ നഷ്ടമായി അനാഥനായി തീര്ന്ന ബാലനായിരുന്നു പാന്ക്രസ്. മാതാപിതാക്കള് മരിച്ചതോടെ അനാഥനായി തീര്ന്ന പാന്ക്രസിനെ അമ്മാവനായ ഡയോണിയൂസ് റോമിലേക്ക് കൊണ്ടു പോയി. അവിടെ വച്ച് ഇരുവരും ക്രിസ്തു മതവിശ്വാസികളായി മാറി. ക്രിസ്തുമതം സ്വീകരിക്കുക എന്നാല് മരണം വരിക്കുക എന്നായിരുന്നു ആ കാലത്ത് അര്ഥം. ക്രിസ്ത്യാനികളെ കൂട്ടത്തോടെ കൊന്നൊടുക്കാന് ചക്രവര്ത്തിയായിരുന്ന ഡിയോക്ലീഷ്യന് ഉത്തരവിട്ടിരുന്ന സമയം. ക്രിസ്തുമതം സ്വീകരിച്ചതിന്റെ പേരില് ഇരുവരും തടവിലാക്കപ്പെട്ടു. എന്നാല്, യേശുവിനെ തള്ളിപ്പറയുന്നതിലും ഭേദം മരണം വരിക്കുന്നതാണെന്നു പതിനാലു വയസുമാത്രം പ്രായമുള്ള പാന്ക്രസ് ഉറക്കെ വിളിച്ചുപറഞ്ഞു. ക്ഷുഭിതനായ സൈന്യാധിപന് പാന്ക്രസിനെ തലയറുത്തു കൊന്നു. പാന്ക്രസിനൊപ്പം മൂന്നു പേര് കൂടി മരണം വരിച്ചു. വി. നെറേസ്, വി. അഷിലേസ്, വി. ഡൊമിറ്റില എന്നിവരായിരുന്നു അവര്. എല്ലാവര്ക്കു പിന്നീട് വിശുദ്ധ പദവി ലഭിച്ചു. ഇംഗ്ലണ്ടില് കത്തോലിക്ക സഭ സ്ഥാപിക്കപ്പെട്ടപ്പോള് പാന്ക്രസിന്റെ ഭൗതികാവശിഷ്ടങ്ങള് വിറ്റാലിയന് മാര്പാപ്പ ഇംഗ്ലണ്ടിലേക്ക് അയച്ചു. പാന്ക്രസിന്റെ നാമത്തിലാണ് വി. അഗസ്റ്റിന് ഇംഗ്ലണ്ടില് ആദ്യത്തെ ദേവാലയം സ്ഥാപിച്ചത്. പാന്ക്രസിന്റെ ജീവിതത്തെപ്പറ്റി കൂടുതല് വിവരങ്ങള് ആര്ക്കുമറിയില്ല. പതിനാലാം വയസില് കൊല്ലപ്പെട്ടു എന്നതു മാത്രമാണ് അറിവുള്ള കാര്യം. എന്നാല്, ആ വിശുദ്ധന്റെ നാമത്തില് പ്രാര്ഥിക്കുന്നവര്ക്ക് ഒട്ടേറെ അദ്ഭുതങ്ങള് ലഭിച്ചു. കൗമാര പ്രായക്കാരുടെ മധ്യസ്ഥനാണ് വി. പാന്ക്രസ്.
2 weeks ago | [YT] | 421
View 7 replies
SVM KARUKUTTY
അനുദിനവിശുദ്ധര് : മെയ് 11
വി. ഇഗ്നേഷ്യസ് (1701-1781)
ദരിദ്രനായ ഒരു കര്ഷകന്റെ മകനായിരുന്നു ഇഗ്നേഷ്യസ്. ഒരോ ദിവസവും തള്ളിനീക്കാന് ബുദ്ധിമുട്ടുന്ന കുടുംബം. മറ്റ് ആറു സഹോദരങ്ങള് കൂടിയുണ്ടായിരുന്നു ഇഗ്നേഷ്യസിന്. പട്ടിണിയുടെ ദിവസങ്ങളായിരുന്നു എന്നും. വളരെ ചെറിയ പ്രായം മുതല് തന്നെ കര്ഷകനായ അച്ഛനൊപ്പം കൃഷിജോലികള് ചെയ്യാന് ഇഗ്നേഷ്യസ് നിര്ബന്ധിതനായി. എന്നാല്, 17 വയസു പ്രായമായപ്പോള് പെട്ടെന്നൊരു ദിവസം അവന് രോഗബാധിതനായി. ദാരിദ്ര്യത്തിനിടയില് രോഗം കൂടിയായതോടെ ആ കുടുംബം ജീവിക്കാന് വല്ലാതെ ബുദ്ധിമുട്ടി. തന്റെ രോഗം മാറ്റിത്തരണമെന്നു കരഞ്ഞു പ്രാര്ഥിച്ച ഇഗ്നേഷ്യസ് രോഗം മാറിയാല് പുരോഹിതനായി പ്രേഷിതപ്രവര്ത്തനം നടത്താമെന്നു ശപഥം ചെയ്തു. രോഗം മാറി. എന്നാല്, പുരോഹിതനാകാന് ഇഗ്നേഷ്യസിനെ അച്ഛന് അനുവദിച്ചില്ല. കുറച്ചുനാള് കൂടി കാത്തിരിക്കാനായിരുന്നു അയാള് ഇഗ്നേഷ്യസിനോട് ആവശ്യപ്പെട്ടത്.
അങ്ങനെയിരിക്കെ ഒരു ദിവസം കുതിരപ്പുറത്തു യാത്ര ചെയ്യുകയായിരുന്ന ഇഗ്നേഷ്യസ് പെട്ടെന്നു കുതിരയുടെ മേലുള്ള നിയന്ത്രണം വിട്ടു. കുതിര ചീറിപ്പാഞ്ഞു. ഭയംകൊണ്ട് അവന് ദൈവത്തെ വിളിച്ചു. തന്റെ ശപഥം പാലിച്ചുകൊള്ളാമെന്നു ആവര്ത്തിച്ചു പ്രാര്ഥിച്ചു. പെട്ടെന്ന് കുതിര ഓട്ടം നിര്ത്തി. തന്നെ പല തവണ മരണത്തില് നിന്നു രക്ഷപ്പെടുത്തിയ ദൈവത്തെ അവന് സ്തുതിച്ചു. വൈകാതെ വി. ബെനഡിക്ടിന്റെ കീഴിലുള്ള സന്യാസിമഠത്തില് ചേര്ന്നു. അവിടെ 15 വര്ഷത്തോളം സേവനം ചെയ്തശേഷം അദ്ദേഹം വീടുകള് തോറും കയറിയിറങ്ങി യേശുവിന്റെ നാമം പ്രസംഗിച്ചു.
എല്ലാ വീടുകളിലും കയറി സംഭാവനകളും ഭക്ഷണസാമഗ്രികളും സ്വീകരിച്ച് സന്യാസിമഠത്തില് എത്തിക്കുക ഇഗ്നേഷ്യസിന്റെ ചുമതലയായിരുന്നു. എന്നാല്, അവിടെയുള്ള പിശുക്കനായ ഒരു പണക്കാരന്റെ വീട്ടില് മാത്രം ഇഗ്നേഷ്യസ് കയറാന് തയാറായില്ല. തന്റെ വീട്ടില് മാത്രം ഇഗ്നേഷ്യസ് കയറാതെ പോകുന്നു എന്നു മനസിലാക്കിയ അയാള് ഇഗ്നേഷ്യസിന്റെ മേലധികാരികളോട് പരാതി പറഞ്ഞു. അവരുടെ ആവശ്യപ്രകാരം ഇഗ്നേഷ്യസ് അയാളുടെ വീട്ടില് പോയി. ഒരു ചാക്ക് നിറയെ അരി അയാള് കൊടുത്തയച്ചു. ആ ചാക്കില് നിന്ന് അരി പൂര്ണമായി എടുത്തുകഴിഞ്ഞപ്പോള് ചാക്കില് നിന്നു രക്തമൊഴുകാന് തുടങ്ങി. ''ഇത് പാവങ്ങളുടെ രക്തമാണ്'' എന്നു ഇഗ്നേഷ്യസ് വിളിച്ചുപറഞ്ഞു. ആ വീട്ടില് ഞാന് ഭിഷയാചിക്കാന് പോകാഞ്ഞതും ഇതു കൊണ്ടുതന്നെ.
1781 മേയ് 11ന് ഇഗ്നേഷ്യസ് മരിച്ചു. 1951ല് പോപ് പയസ് പന്ത്രണ്ടാമന് മാര്പാപ്പ ഇഗ്നേഷ്യസിനെ വിശുദ്ധനായി പ്രഖ്യാപിച്ചു.
2 weeks ago | [YT] | 339
View 7 replies
Load more